新一屆立法會好多人聲大夾惡，秘書長吳文華（Pauline）爆料，由於曾鈺成把聲冇范太咁響，為免主席無聲失勢，秘書處特別換咗兩支新咪，開咗幾次會，效果不俗，如果有人玩鬥大聲，就要再想對策。
掟蕉事件仲有手尾，立法會申訴部至今收到逾70個「意見」，秘書處正整理意見向議員交報告，Pauline稱事件令保安組感到無所適從，疑惑如果有議員唔聽主席指示離場，保安人員應該點樣呢？佢已同保安組開會，落咗咩指示卻冇透露。
除服侍議員，秘書處另一沉重工作係招呼參觀團，近來多咗小學生參觀，以前最多人問馬丁坐邊，𠵱家嘅細路問得最多係長毛坐邊個位，估唔到長毛有咁多小fans。