西九管理局董事局噚日首次開會，成為「西九龍皇帝」嘅政務司司長唐英年心情勁靚，特別借用金管局位於國金二期55樓會議室開會，居高臨下眺望對岸西九40公頃土地，大有君臨天下指點江山氣勢。
成員指開會似做騷
會議開始時，唐英年好戲劇性咁扮上帝叫下屬拉開窗簾：Lettherebelight！（要有光！）窗簾徐徐拉開，全場眼前一亮，呢個時候，佢一副專家口脗咁講，好多人唔知40公傾實際有幾大地方，隨手指一指窗外，話足足有兩個維園咁大㗎。
表演完畢終於談正事，閉門會議開咗三粒鐘，會後唐英年話會透過公開招標，為西九制訂三個藍圖畀市民揀，同時公佈六個小組委員會主席人選，民主黨副主席單仲偕睇人事，負責制訂管理局行政總裁同總監人工，民政局德成局長做投資委員會主席，好多人覺得奇怪，點解唔係財經局局長陳家強。
幾個小組委員會主席表面上係與會者共識，實際由「西九龍皇帝」欽點，有董事局成員嘀咕，第一次開會就做橡皮圖章，如果下次開會都係咁樣做，請假做其他正經嘢好過。