經濟差，各行各業都嗌救命，喺咁嘅時勢，大家最緊要逆境自強，諗辦法自保。噚日華華出差由上海返港，就發現港龍航空已經使出優惠新招谷客源，今次嘅對象唔係商務客，而係針對內地廿四孝父母。
究竟乜嘢新招，就係「買二送一」優惠。港龍同國泰航空（293）特別推出香港廸士尼樂園旅遊套票「買二送一」優惠，個package包括機票、酒店住宿及樂園門票，按呢個旅遊套票優惠計算，相當於打個七折。航空公司「二人同行，一人優惠」就時有所聞，「買二送一」就真係少聽見。
記得沙士期間，冇人敢喺香港做生意，當年國泰就賣大包畀咗好大優惠開拓客源，吸引港人喺海外嘅親朋戚友來港探親。
今次金融海嘯下，航空公司又到出招自救嘅時候。