「秋官效應」大家都耳熟能詳，咁「麥兜效應」又有冇聽過？佢嘅殺傷力絕對唔講得笑，唔係華華無中生有，而係曾經參與麥兜動畫製作嘅袁建滔，喺個人網誌留言話：「其實除了『丁蟹效應』外，『麥兜效應』亦相當靈驗，殺傷力更巨大。」
「麥兜效應」威力有幾勁？97年首部麥嘜動畫TV版《麥嘜故事》製作冇耐，亞洲金融風暴就爆發，恒指江河直瀉六成，低見6660點。2001年，第一齣《麥兜故事》動畫電影開始製作，又撞啱911恐怖襲擊，恒指半個多月插水超過2000點。兩年後即03年，製作《麥兜：菠蘿油王子》，咁啱得咁蹺又撞正沙士，港股半年急挫近兩成。
新片製作中 大市又跌
今年《麥兜．武當》嘅製作如火如荼，竟然又碰正百年一遇嘅世紀金融海嘯，恒指高台跳水，年初至今急瀉55%，都咪話唔信邪。難怪網誌主人袁建滔結尾話：「再搞落去，我怕會世界末日，準過健次（電影《20世紀少年》男主角）嘅預言書。」
麥兜係隻豬，又唔係熊，邊個會諗到跌市又關佢事？
金融海嘯套餐
麥太：家吓除咗特餐、常餐，仲有乜餐？
黎根：嘩，犀利囉，有金融海嘯套餐呀！
跌市坐艇唔使愁，華華噚日收到讀者email一個「金融海嘯套餐」下火，呢個套餐由網友Casablanca-220設計。
餐前小食：勒緊褲頭過日子薑一碟
時令精品：真正紮實甘香和味足両大閘蟹全體
精選菜式：
經濟實惠吊鹽水 陸續有嚟炒鮮魷
三聚氰胺炸鮮奶 孔雀石綠燉冬菇
無底深潭苦瓜盅 酥皮迷你債券批
窩輪炒河（簡稱「窩河」）
乞米炒飯（簡稱「乞米」）
美點雙輝：
炒燶期指餅 勁蝕千層糕
滋潤糖水：過眼雲煙白果水
菜價：$7000億
席設：金融大酒樓海嘯廳
試菜嘉賓：吹水詩人
註：上述特價套餐有效期至不知何年何月
李華華
mailto:[email protected]