歷史不斷重複。10月股災、藍籌沙士價，幾年前蕭條嘅日子，好似又重現眼前，連煲呔都「老董化」先得人驚！煲呔上星期施政報告宣佈成立經濟機遇委員會，想喺金融大海嘯中搵商機，官場上下、政壇內外聽到又搞呢啲嘢都打個突，好多人即時反應係「做乜煲呔學咗老董啲嘢！」
老董任內幾乎每年一「港」，最愛打造「平台」、建設「樞紐」，成立「中心」、「委員會」更不計其數，當中以「行政長官特設國際顧問委員會」最巴閉，成員星光熠熠，西門子、滙控、AIG、Shell、豐田、GE等跨國企業高層都嚟過香港開會，呢個委員會職能係從國際觀點，討論與香港長遠發展相關策略性問題，一睇就知係吹水好題材，至於呢個會傾咗啲乜，相信冇乜人知道亦冇乜人記得。
抄舊橋搞口水會
身為特首，唔搵班猛人喺身邊吹水，又點顯示自己高瞻遠矚呢？煲呔噚日話「經濟機遇委員會」要及時評估金融海嘯形勢，籌謀對應之道，同埋捕捉新機遇，提高香港國際競爭力；吹到咁大，八方都要佩服佢忍得住唔笑，成員之一施永青好老實，話自己曾婉拒加入呢類口水會，不過煲呔堅持，佢推無可推先應承。
煲呔盛意拳拳，施永青卻大潑冷水，認為市民千祈唔好對呢個委員會期望過高，以為成班人坐埋就係「指路明燈」，絕對係不切實際。文化人胡恩威則話，經濟與文化不能分割，佢唔知自己識唔識高深經濟問題，會以一般小市民常識去講意見，至於搵到乜創富機遇，真係唔知嘞。
呢個最新成立嘅口水會，由煲呔做主席，好兄弟鬍鬚曾做副主席，下月3號首次開會，煲呔話已邀請國際貨幣基金組織亞太區主管伯頓與會，介紹金融危機對全球影響最新情況，期望月內提交方案。煲呔做咗幾年特首，好學唔學竟然翻炒老董舊橋，再搞埋啲口水會，只怕又重蹈議而不決，決而不行覆轍。
其實呢個世界「講嘢」嘅人已經夠多，不斷開會吹水，都唔可以幫到置身水深火熱嘅市民，煲呔之前話會認真思考外界批評，吸取教訓，點解改唔到高大空陋習呢？開少啲口水會，認真查找不足好過啦。
mailto:[email protected]
機遇委員會成員
戴維思（渣打集團主席）
馮國經（利豐集團主席）
劉遵義（中大校長）
梁家齊（鷹達證券主席）
梁高美懿（滙豐銀行總經理）
麥嘉軒（畢馬威會計師事務所合夥人）
斯蒂芬．羅奇（摩根士丹利亞洲有限公司主席）
施永青（中原集團主席）
汪穗中（德昌電機主席）
胡恩威（進念二十面體行政總裁）
資料來源：新聞處