三更半夜趕稿，唔咬住支筆都寫唔出字，隔夜麵包、發霉薯片乜都質入口，唔𡁻嘢唔精神；開會仲大壓力，連編輯都想咬；瞓覺又不自覺磨牙，總之就牙痕痕。怨氣無從抒發，惟有Keep住放嘢入口，吮啜𡁻咬招招出齊，就連專家都話，減壓真係要靠出口術。
記者：吳允冲
攝影：王文忠
模特兒：Vanessa（StageModels）
鳴謝：臨床身心行為學家李寶能
呃大腦滿足食慾
嘴，係人體興奮嘅原點，所以臨床身心行為學家李寶能好贊同靠口部運動減壓：「咀嚼，又或者口噏噏，例如𡁻香口膠或咬任何嘢，都可以欺騙大腦。」欺騙大腦啲乜？「畀錯誤訊息大腦，等大腦以為自己食緊嘢，滿足食慾。人嘅壓力，好大部份來自對慾求嘅不滿，要減壓，最有效直接方法就進食滿足食慾，先充實生理上嘅慾求。」即係話，要呃自己先要呃大腦，就算唔係真係食嘢落肚，純粹嘴郁郁當有食嘢，都可以望梅止渴。OL們，以後有藉口喪食朱古力、薯片加雪糕啦，怕肥？話之佢啦，減壓要緊呀。
十大出口術
1.啜──打茄輪最減壓
口部運動中，以吸啜活動最減壓，法式濕吻大家鬥啜，交換溫柔交換體液當然最到肉，零阻隔感受對方味道，效果最佳。矜持啲，錫吓面珠都夠甜蜜，輕輕一吻當作愛的鼓勵亦可。無打茄輪對象？Sorry，錫住飛輪海張海報先啦。
減壓度：★★★★★
2.塞──奶嘴有安全感
點解BB一喊，阿媽就塞個奶嘴畀佢食？同一道理，食住奶嘴會令BB大腦有錯覺，以為自己食緊嘢，亦令BB有被呵護、被媽咪抱入懷嘅感覺，一句講晒即係有安全感。如果你無安全感，寂寞到無人理，唔好怕醜，匿埋一角，塞個奶嘴入口啦。
減壓度：★★★★★
3.𡁻──郁牙骹放鬆心情
十元八塊買到一排香口膠，真係好方便！香口膠既可驅除口氣，眼瞓嗰陣仲有強勁薄荷味令人醒一醒。緊張，𡁻番粒，郁吓牙骹，可以舒緩焦慮情緒，咀嚼動作可以控制血壓同荷爾蒙水平，令你放鬆心情。
減壓度：★★★★★
4.咬──不爛指甲誓不休
細路你鍾意啜手指，係基於對媽咪嘅依戀，通常大個之後就會演變成咬手指習慣。咁大個人仲咬手指甲，雖然可以舒緩不安，但亦係自信心不足嘅表現，唔好以為好Cutie，尤其男人老狗，呢個動作不但稚氣未除，咬到指甲參差不齊仲好趕客㖭。
減壓度：★★★★☆
5.磨──靠支筆Relax
好多人溫書、諗嘢嗰陣都會擺支筆入口，左右轉動用上下兩排牙齒出力磨，搞到筆頭佈滿牙印。呢個動作反映自信心不足、心情緊張焦慮，不過同時都釋放到壓力。其實咁多嘢唔擺入口，點解係都要咬筆？買多包零食傍身好過啦。
減壓度：
★★★★☆
6.擔──牙籤誘發回味食物
擔住支牙籤雖然好麻甩，但原來都可以減壓，因為呢個口部動作，會誘發人回想剛剛食落肚嘅美味食物。鬼咁滋味，難怪啲叔叔嬸嬸咁鍾意撩牙，簡直越撩越舒服，不過撩牙會增大牙縫，引致牙周病，有撩牙癮要戒，轉用牙線啦。
減壓度：★★★☆☆
7.噬──愛恨牙齒印
效果好似打人一樣，但唔主張噬仇人，仇人亦唔會企定定俾你咬。退而求其次，噬你的愛人啦，同對方講：「我要噬你一啖！」噬到手臂輕輕有個牙齒印，既可發洩怨氣，亦算調情一種，當然，力度要識得控制啦。
減壓度：★★★☆☆
8.齧──枕頭咕𠱸受罪
齧（音熱），用力咬到有缺口咁解。BB仔咬公仔、枕頭、被角，反映安全感不足，對母親依賴，要攬住啲嘢增加安全感。齧呢個動作比較用力，仲要係長時期用力，可以發洩憤怒，不過齧得多牙齒會唔整齊，甚至開合畸形，自己諗嘞。
減壓度：★★★☆☆
9.吮──飲管釋放焦慮
呢個小動作好反應一個人本身性格，有人飲嘢唔用飲管，大啖大啖灌落肚；有人就算飲晒杯嘢都吮住支飲管，將飲管吮到霉霉爛爛，又或咬到彎彎曲曲、前後摺幾摺。呢個嘴郁郁動作唔單止口痕，更加係釋放焦慮表現。
減壓度：★★☆☆☆
10.刷──按摩牙肉尋快感
《孤男寡女》入面嘅鄭秀文，一遇壓力就刷馬桶，其實唔開心可以順便刷埋棚牙。不過要搞清楚，刷牙動作唔會產生快感，係按摩牙肉同口腔肌肉先會產生快感，繼而舒緩壓力。不過刷牙要注意力度，千祈唔好起勢刷，否則會傷害牙肉。
減壓度：★☆☆☆☆
咬飲管測吃醋指數
吮飲管無疑減到壓，但呢個係壞習慣，睇落核突，仲會暗示畀人知你係咪大醋酲。想知自己係邊類人？玩以下心理測驗咪知囉。
問題：用飲管飲完杯可樂，你會點做？
a.咬爛飲管
b.輕輕啜住唔放
c.飲完擺埋一邊
分析
a.呷醋指數100%
超級大醋埕，男女朋友身邊出現任何同性定異性，你都睇唔順眼，恨不得趕佢走，自己畀自己壓力，另一半都唞唔到氣。
b.呷醋指數50%
小醋埕，男女朋友同異性朋友傾電話，你都好大方，唔會過份干涉，一旦過於親密，你就會Feel到甩拖壓力，大發雷霆。
c.呷醋指數25%
唔多識呷醋，你根本唔在意另一半同邊啲人接觸，更遑論接觸親密唔親密，小心俾人撬牆腳呀。
Square的口部運動
初入樂壇新組合Square，四子平時有無咬嘢舒壓嘅習慣？
喪𡁻香口膠
James（何尚謙）：「我無時無刻都𡁻香口膠，一緊張就咬得特別肉緊，都無乜咬嘢習慣，細個瞓覺會咬被角咁囉。」
咬爛手指
Rex（何浚尉）：「緊張或者專心做嘢嗰陣會咬手指，唔咬手指可以咬乜？我都知係壞習慣，細個仲會咬到啲指甲爛晒。」
咬爛毛巾
Gary（趙俊承）：「緊張會吞口水，無咬手指習慣，細個俾阿媽抦，會咬爛毛巾，咬住嚟撕，好大火氣㗎。」
食朱古力
Brian（李柏煥）：「一緊張會想食朱古力，心理學家話咬手指係無自信表現，所以我唔咬手指唔咬嘢。」
