早排公仔箱播《與敵同行》，少少懸疑少少驚慄，叫好可惜不叫座。計我話，想搶收視不如「與廸同行」，Exclusive版外橙內黑TTCoupe，3.2公升V6偈，外形搶，性能更佳，一落街即引來矚目眼光，虛榮感爆晒燈！
記者：梁美甜
攝影：譚盈傑
Model：Chris@StageModel
一出車就被人狂昅
唔係第一次介紹TT，之但係長揸狂踩就真係第一次。從前每次影車試揸都只係十零廿分鐘左右，掟吓彎跑吓直路咁，唔係話試唔到，而係唔夠喉啫，稍稍一試就滿足嘅車，邊有人買！
新一代TT喺推出時已經試揸過，然而，今次代理借出呢部加多個Exclusive配套嘅3.2V6頂級版TT作為長期測試，揸咁多日，就俾人昅足咁多日。由九龍灣攞車，至直駛將軍澳工業村短短十零分鐘車程，由於仲係摸索性能階段，無貿貿然狂掟返公司，於是乎，由手指都數唔晒咁多部車喺身邊經過時，睇住隔籬車，人人都要「座」低昅吓司機（本人）廬山真面目，小妹姿色欠奉，差在未同大家Say個Hi，竟然要委屈各位司機大佬將就TT跑車格，「座」低嚟八就真係失覺晒，喺未認真試過性能之前，首先深刻地感受到，鮮燈色Exclusive頂級版TT絕對係收視保證，怪不得成日聽到朋友打趣話：「買番嚟香港邊係為咗揸㗎，係為巡遊Show-off至真！」呢一刻，好啱！
V6偈引爆慾望
被人昅，唔單止係第一日，之後每一日都同樣上演，某日由屋企附近停車場駛出閘時，突然一個人影閃出嚟，踩Brake，即停，原來係個阿叔跑出嚟用手機影部車，嚇得我吖！
咩叫清脆利落？TT完全演繹得到。3.2公升V6頂級版配備咗Audi招牌quattro同埋STronic六前速波箱，加埋軚環加減撥片，以D波起步已經爽快，若然推至S波嘅話，Sorry，旁邊有類似跑車物一定以為你撩架打，成部車飆住出去，仲好有推背感，加埋跑桶椅同埋低地台跑格，唔覺唔覺就會揸快咗，最慘係STronic六速轉波順暢，Feel唔到轉波時行到咁上下，咦？成百米喇！無番咁上下自制力，隨時俾TT激發飆車慾望，quattro轉彎時更能表現出嗰份能耐，上龍翔道，多車之餘，車道暗斜又有急彎，車身細小加速馬力大性能高嘅結果係，切線爽快，quattro令轉向入彎時準繩度高，加速踩油，絕塵而去咪就係咁囉！
惟高速入彎時車身有少少偏離車道，只要放開油門加上quattro適時發揮作用，輕轉軚環已經可以調番入軌道，就算心血來潮，利用加減撥片玩轉拖波亦疏肝，以手指輕按撥片，車速即作出回應，收放自如。養得起跑車嘅人，絕對唔會計油錢呢啲「細數」，勢估唔到TT，仲要係3.2公升V6偈，以慳得一蚊得一蚊為前提，呢部車真係玩得過癮又抵，以入滿油大約$800左右，行咗427公里，仲要係不時以地台油同埋S波FullPower飆住行，有數得計，大約$1.8/km，跑車喎，一公里唔使兩蚊，抵玩到暈！無論係收視搶鏡抑或性能好玩都爆晒燈，唯一考慮，係車價唔算抵。
話你知：Exclusive貴多廿萬
雖則唔係通街係TT，但每日都不時見到一、兩部行過，多數都係黑同白，無乜驚喜，要驚喜又鍾意人注視，咪畀多幾個錢囉，盛惠$713,852！
規格AudiTT3.2CoupeExclusive版
引擎：3,189c.c.V6
馬力：250ps/6,300rpm
扭力：320Nm/2,500-3,000rpm
傳動：STronic六前速，前置，四輪驅動
極速：250km/h
售價：$713,852
查詢：奧廸汽車（25281862）
