自由黨新主席劉健儀（Miriam）上場冇耐，田少同周梁又唔肯做「太上皇」幕後指點，佢惟有向前輩求教，創黨主席飛哥自然成為目標。飛哥向八方透露，Miriam近十年冇同佢傾電話，近日忽然call佢探討黨未來路向。
送到上門，飛哥一於叫Miriam接受訪問，飛哥喺節目中讚Miriam臨危受命，即場醒咗三個錦囊畀新主席：第一係要堅持中間偏右路線，洗脫「富貴黨」稱號；第二係唔好向富豪屈服，飛哥話地產建設商會聲言向自由黨閂水喉好侮辱，佢自爆當年為黨籌款時，有個富豪問自由黨可以幫佢間公司做乜，飛哥話當時嬲到拍枱走人。呢位富豪畫公仔畫出腸，咁低能，簡直侮辱飛哥智慧，八方覺得飛哥唔兜巴星佢算好畀面。飛哥則話自由黨唔係乞兒，唔使去乞錢，只要當市民係老闆，一定能夠生存，Miriam都話有道理。
至於第三個錦囊，就係要做地區工作，飛哥指Miriam向來唔落區，日後要補飛，Miriam反駁，表示近來日日上街協助中小企。
自由黨元氣大傷，Miriam好感慨咁話呢個位唔易做，當務之急係重整旗鼓挽回黨員、市民信心，至於未來發展，佢話：「講係冇用，最緊要做。」