港股噚日曾經一度跌成2000點，勢估唔到有咁慘烈嘅場面，恒指收市仍跌超過1600點，險守11000點大關，跌幅12.7%；H指更大跌812點，5000大關失守，跌幅14%。期指尾段有淡友補倉，掃高成300點，收11148，跌1352點，又有百多點高水。
大戶造淡，有恃無恐，港股已成為沽空者全球唯一套現能力最強的樂園。約一個月時間，恒指由接近20000點掉頭急挫，噚日最低落到10676，足足跌咗46%，以往有好多例子，一個熊市，由頭到尾嘅跌幅都冇咁多。就以最近呢5個交易日為例，恒指由15616跌到10676，跌幅超過30%，個別股票唔出奇，但係大市呢，就肯定係一個欲哭無淚嘅慘痛經歷。
事實上，正當全球主要股市都唔准沽空之時，港府是否仍要一意孤行呢？一個水塘有幾個水壩，𠵱家閂剩一個，塘水就肯定好似山洪暴發一樣，響呢個缺口衝出去，淹沒大片土地，死傷無數，災情會越來越嚴重，情況就同只係得港股可以沽空一樣，港人就算築起血肉長城都擋唔住。
港股成沽空者樂園
港股今次跌勢咁急，睇18000，再睇16000，跟住14000，轉眼噚日已幾乎去到10000大關，完全冇得守，就算補倉都補唔到咁快，今次呢個金融海嘯，真係死得人多，上市公司出事，會越爆越大鑊。
上禮拜四，話可以響跌定之時入市博反彈，結果大市未跌定，仲再大跌3日，夾埋跌咗成3000點，噚日收11015，足足拋離250日線（23647）超過53%，已係在極度不理智情況下的嚴重超賣，預期一次強烈反彈會隨時出現，但切勿輕舉妄動，寧願反彈確認後，買貴一千幾百點，好過一買落去就輸咗一千幾百點。
賤物鬥窮人，好多股票嘅PE只係跌到兩三倍，但跌勢仲未止，好似兗州煤業（1171），啱啱宣佈今年第3季度業績，受惠現貨煤價上升，大賺28.84億元人民幣，同比升3倍，而首3季淨利潤就有66.46億元人民幣，大升2.6倍，並預期全年盈利會增長近2倍。兗煤噚日跟市大跌，低收3.02元，大跌14%，預測PE只係2倍，呢類股票一反彈，升幅起碼幾成。
郭兆誠