港府稍後向立法會申請撥款興建蓮塘新口岸，發展局安排議員下個月中實地視察，不過林鄭局長好醒目，先旨聲明此行只會喺香港境內視察，唔包括參觀深圳方面嘅蓮塘口岸用地，因為喺香港都可遠眺對面情況，唔使過關。
發展局咁講，意味冇回鄉卡議員唔好奢望有機會破冰北上。呢個考察團幾考腳骨力，議員參觀落馬洲河套規劃工作最新進展、邊境禁區規劃研究情況外，仲要經渠務署維修小路行入落馬洲河套區範圍，再經馬草壟前往白虎山，之後要行成90級梯級上到水務署儲水庫頂，先可一覽深圳蓮塘及香港竹園村全景。如果議員仲有氣力，可以去埋周田村、鳳凰湖村，同埋收地起路嘅竹園村。