百足咁多爪嘅公民黨議員陳淑莊（Tanya），表演慾旺盛到瀉，前晚佢出席港台節目《二千靚歌再重聚》，節目晚上9點開始，凌晨結束，除咗新聞時段，Tanya唱足三個鐘，最拿手係小鳳姐金曲，佢把略帶磁性、有啲沙沙哋嘅聲音，十分獨特。
Tanya舞台經驗豐富，不過佢話去到立法會呢個政治舞台，完全唔係嗰回事，現實永遠冇咁簡單，佢有大把嘢要學。至於唱歌技巧，Tanya謙稱純屬業餘水準，大家唔好對佢要求太高。唔止上得台，原來Tanya仲入得廚房，近日佢參加港島區議會明火美食烹飪大賽，整咗碟意粉同蒸魚，睇落有板有眼。佢男友係大廚級人馬，梗係唔可以失禮啦。