聖誕鐘，買滙豐。呢個傳統智慧，今年備受考驗，因為港股喪跌，大笨象都不能獨善其身，失守「紅底股」後，噚日再插水。大笨象向來係散戶至愛，好多人見到股價跌到80幾蚊，幾乎重返「沙士價」，紛紛入市以為執平貨，可惜散戶血肉長城失守，大笨象噚日收報75蚊，搶先撈底者通通燒手指。
應家柏撈底買滙豐
80幾蚊股滙豐，同幾個月前百幾蚊比較，睇落真係好抵買，八方聽聞馬會行政總裁應家柏噚日都有入市，喺80幾蚊買入滙豐，掃咗幾多手無透露。大笨象全日跌13蚊，跌幅接近一成半，應家柏即時坐艇。80幾蚊買滙豐算唔算入錯市呢？日後先知答案，但據講應家柏處之泰然，對大笨象好有信心，揸中、長線絕冇問題，既然難以真正撈底入貨，冇乜可能最低買最高賣賺到盡，𠵱家買滙豐都算穩陣。
滙豐被視為「香港央行」，馬照跑又係香港繁榮穩定象徵，應家柏跌市買滙豐，有人話係用鈔票對香港投下信心一票，如果大笨象都出事，全世界亦冇運行，買其他股仲弊㖭！馬會高層都入市，咁你今日撈咗底未？
八方知道好多官員都係獅子銀行小股東，因為公務員愛穩陣，除咗買樓，投資心水就係買大藍籌，剛退休嘅郵政署署長譚榮邦，據知多年前開始買滙豐，期間股票一拆三，平均買入價僅幾十蚊，連埋股息收入，應該已經返本有凸，𠵱家每年收息都夠養老。
梁家騮放得算合時
醫學界議員梁家騮都係大笨象擁躉，幾年前佢追討假期補薪同醫管局打官司，據知喺130幾蚊左右沽清滙豐股票，套現300幾萬做「彈藥」，好彩佢勝訴，可以追番筆錢，否則幾百萬白費。佢噚日同八方講，近日與醫管局主席胡定旭碰面時，對方笑言佢應該多謝醫管局，因為若非佢要打官司而沽貨，𠵱家可能蝕大錢！
騮哥話當時因為要用錢而賣滙豐，冇諗過係咪最好價位出貨，至於近日大笨象跌到殘，佢有冇心動撈底呢？佢話撈底呢啲高難度動作，唔係佢呢啲散戶玩嘅，見到個市兵荒馬亂，佢亦不敢輕舉妄動，個人投資隨大市走勢，總之蝕到冇眼睇。
mailto:[email protected]