華爾街大行唔係爆煲就等人救，搞到政府要泵水7000億美金（下同）救市，但三間大行美林、高盛同大摩，夾埋依然有約200億美金獎金派，高層依然有花紅袋，真係要嘆句同人唔同命。
彭博報道，美林將撥備67億，作為今年頭3季畀員工嘅獎金。以佢哋最近裁員後剩番約6萬多人計，平均每人有11萬銀；不過都唔及大摩嘅13.8萬，更追唔上高盛嘅21萬，事關高盛同大摩一早講咗，會各自撥60幾億銀做花紅。就連破咗產嘅雷曼兄弟，部份員工依然攞到同上年差唔多嘅獎金。
不過咁，報道話條數係按大行往例計算，即係將60%薪金同福利，以年終獎金派發，所以之前講嘅都只係撥備，啲錢未到員工手，要等會計年度結束先會派。不過今時唔同往日，相信好多大行會重新分配呢啲資金，到時係咪仲有得攞都未知。