女子組合2R嘅Race、趙碩之同埋賈曉晨（JJ）噚日一齊到黃埔出席時裝騷，三位靚女上圍都係有睇頭，不過當然以趙碩之最勁，唔知Race係咪知自己天生本錢唔夠撼，所以竟然攞住兩個南瓜放喺胸前「裝胸作勢」！
近日金融海嘯令唔少人損失慘重，Race話爹哋都係受害者，但佢就冇透露爹哋損失幾多，佢話：「我同家姐會返新加坡同妹妹慶祝生日，另外我有個重要任務，就係要幫爸爸做心靈輔導，呢個金融海嘯佢唔見咗好多錢。」
父炒燶股要幫補
Race仲話去年自己喺股壇損失6位數字，搞到佢都唔敢再投資，所以今次金融海嘯佢避過一劫，Race話：「我損過手唔敢再買啦，我都係要努力搵錢，我都希望自己有能力可以幫到爸爸。」再問到Race會唔會帶男友返新加坡見家長？佢笑笑口話：「邊個先？唔會啦，今次只係同家姐返去。」
另外，同場嘅趙碩之所着嘅高踭鞋過大，所以佢行騷時險甩鞋，事後佢都話好尷尬，佢話：「隻鞋真係好鬆，行騷時步步為營，都幾尷尬㗎。」趙碩之又指以前行騷遇過唔少蝦碌事，佢話：「我試過一路行騷，件外套一路甩晒啲飾物落嚟，甚至連假眼睫毛都甩埋。」