加拿大老友P自溫哥華回港，打電話搵左丁山敍舊，於是一齊到山光道馬會嘉樂樓食北京馬會會所廚師嘅拿手好菜，老友P食到搖頭擺腦，猛咁讚好，老友P未移民前，有「師爺王」之稱，呢晚講起馬會諸位董事名字，老友P竟然話：「葉錫安，當年我有份見佢㗎！」葉錫安已自孖士打退咗好幾年休啦，老友P豈非仲老？老友P立即拿出身份證、長者咭、長者八達通嚟畀我哋睇，證明佢已經過咗六十五歲生日，大家都話想唔到，可能係溫哥華空氣好，生活他條之故，故此老友P嘅面貌十數年不變。
移民多年，何故會有香港長者咭？老友P笑曰：「香港係好好嘅，我去到胡忠大廈，社會福利署人員夠晒效率，我好快就攞齊長者咭與八達通，八達通最冇得頂，星期日搭車全程只係兩蚊，認真便宜。唔好話我貪心呀，我以前喺香港交稅好多年啦，𠵱家攞番少少福利啫！」老友P曾係大律師樓嘅大師爺，好講原則，佢覺得香港永久居民有嘅權利，佢冇理由放棄啫。
正因如此，佢住在加拿大咁多年，全身投入主流社會，加入後備軍隊團，升至做上校成為教官，幾巴閉。佢話一次在唐人街，一位華僑模樣人士讚佢為中國人爭光，中國人以佢為榮等等等，老友P好正統咁回答嗰位華僑：「我係加拿大人，入籍好耐，現在效忠加拿大，當兵唔係為中國人爭光，只係盡加拿大公民責任啫。」原來呢位華僑來自中國大陸，最鍾意在唐人街行走，不參與主流社會活動嘅。
移民外國，理應投入當地社會，但中國人往往以過客心態，抱落葉歸根情意結，多數難以融入外國社會，如果係咁，不如攞完護照，就立刻返回中國香港啦，留在外地做乜吖。仲有另一類，就係一啲酸秀才在外國居留多年，唔知攞咗護照未，充份享受到自由民主與言論自由之保護，但寫文章在香港報紙刊登，就諸多批評當地政府不了解中國，對中國不友好，民主制度養懶人，經濟發展唔夠中國好等等。佢哋固然有言論意見自由（但住在外國先講），但係何必如此？如果有一位外國人久居北京，經常寫文章鬧中國嘅話，相信啲網民憤青已經破口大罵咯！