早前播映的無綫劇集《古靈精探》收視理想，原班人馬獲安排拍攝第二輯，今次除延續第一輯的搞笑路線外，也搞搞新意思，就是郭晉安飾演的于子朗跟郭羨妮飾演的Madam刑結婚生仔，兩人還有個半歲大兒子，剛巧郭晉安的兒子也是六個月大，安仔聞言第一時間堅拒讓兒子拍劇。
郭晉安、郭羨妮、胡定欣和郭政鴻等昨日在將軍澳電視廣播城替無綫新劇《古靈精探II》試造型，今趟沿用第一輯人馬，劇情發展到于子朗（郭晉安飾）跟Madam刑（郭羨妮飾）終於結婚生仔，半歲大兒子更令他們生活起了很大變化。
「辛苦嘢畀我做」
剛巧安仔跟太太歐倩怡也育有六個月大兒子，小B仔可說是拍攝《古II》的最佳人選，不過安仔堅決拒絕，他說：「唔搵得！拍戲好辛苦，辛苦嘢畀我做得喇，等佢大個讀完書先啦。」他覺得跟小演員拍戲難度極高，他說：「好似之前有部同小朋友合作嘅劇，佢戲份都幾重，又要記對白，又要做戲，真係好難。」
記得郭晉安當時拍攝完《古靈精探》，即傳出歐倩怡有喜，郭羨妮對此說：「係呀，佢拍嗰時，已經見佢係咁飲奶同食補品，話要調理身體，生個靚種，拍完後冇幾耐就話有咗！嗰時佢都有介紹我飲奶，話可以補充維他命同所需營養。」提到借安仔的半歲大兒子拍戲，契姑媽郭羨妮也表示反對，她說：「唔得，拍戲好殘忍，時間好長。」原來契姑媽也探望過契姪仔，郭羨妮說：「我去過安仔屋企探姪仔，佢好似Cindy（歐倩怡），已經六個月大，遲啲要再去探佢。」
笑胡定欣犯小人
至於胡定欣和郭政鴻在《古II》中飾演情侶，兩個冬菇頭造型襯絕，不過他們走在一起，最愛互寸。胡定欣表示合作時會特別留意拍檔的感情事，她說：「我都希望佢可以開花結果，呢個幾月會探討吓佢嘅私人生活。」郭政鴻則還擊說：「你呢？你都犯小人啦！」最近跟莊思敏傳出罵戰的胡定欣笑說：「咁你幫我打！」
採訪：楊潔雯
攝影：葉君海
