瞓覺，佔人生三分一時間，邊個唔想放工返到屋企，即刻撻落床見周公？最慘係失眠，明明好眼瞓，明明睡魔急Call，但唔知點解會變Misscall。今日一於為失眠嘅你服務，絞盡腦汁獻計助你入夢搵周公，喂，寫寫吓稿睡意到，唔好嘥，我都瞓陣先……
記者：王震遠
協力：許維雅
攝影：王文忠
模特兒：Wing@PureModel
鳴謝：臨床身心行為學家李寶能
身體精神活動7:3
廣告歌都有唱啦：「~美好睡眠，令到出色的你，會比平日更出色~」失眠真係勁慘，學足Tempo獨男咁左典右典，煲埋《魚樂無窮》一樣毫無睡意，眼光光等天光，時間過得特別慢，再諗起聽朝要返工，壓力馬上暴升十倍。
點解會失眠？臨床身心行為學家李寶能話：「失眠原因分兩類，一，身體活動量不足；二，精神過度活躍。一個生命體，正常生活應該七成身體活動配三成精神活動，可惜現今城市人，八成精神活動配二成身體活動，人腦功能比例改變咗，輕則失眠，嚴重則精神分裂，身心活動失衡，係失眠主因。」失眠有幾大鑊？「日頭做嘢身心俱疲，夜晚瞓覺，自主神經會做補充同修復功夫，失眠無休息，即係自主神經照常運作，不但加劇身體消耗，仲無埋修復機會，身體機能失常，再無改善，健康只會走下坡。」
主角也失眠
拍戲扮失眠，鎂燈世界下嘅主角們各有解決方法，不過始終係做戲，呢類方法Work唔Work？今勻搵10個有關失眠嘅電視電影場口，問李寶能專業意見，如果某啲方法真係Work嘅，記得剪低呢份報紙，放喺枕頭底以備不時之需嘞。
戇豆數綿羊 越數越精神
邊度教：《Mr.Bean》
有無效：★☆☆☆☆
戇豆失眠，打開電視睇人捉國際象棋，諗住悶到抽筋實瞓得着，點知失敗，最後使出撒手鐧，自備一幅綿羊圖慢慢篤慢慢數，仲馬上見效咁話。李寶能評：「如果本身鍾意玩國際象棋，只會越睇越想睇。數綿羊性質一樣，屬單調工作，本身對數字有興趣嘅人，會越數越精神，成效取決於個人差異。」
于素秋聽馬經 悶到瞓着
邊度教：《溏心風暴之家好月圓》
有無效：★★★☆☆
于素秋失眠打俾管家仔，管家仔讀馬經悶到佢瞓為止。李寶能評：「講電話，耳仔同身體都會攰，多咗身體消耗有助入睡。不過傾電話會聽到對方把聲，對方語氣平淡或者好長氣，會悶到想瞓；相反如果好鍾意聽對方把聲，越傾就越唔願收線，盞攞嚟搞。」
陳永仁接受催眠 瞓天光
邊度教：《無間道》
有無效：★★★★☆
做咗三年又三年卧底嘅陳永仁，精神壓力爆錶，睇靚女心理醫生，難得咁有安全感，即刻瞓餐飽。李寶能評：「有效，環境令人覺得有安全感，加上心理治療師做催眠，可以舒緩精神壓力。有類人平時好緊張，一見醫生就鬆弛晒，瞓得舒舒服服。」
加奧聽古仔 解除戒備
邊度教：《鬼眼》
有無效：★★★★☆
性格孤僻嘅加奧有對鬼眼，經常撞鬼惶恐不安，徹夜難眠，心理醫生講古仔𠱁佢瞓覺。李寶能評：「細路仔瞓唔瞓得着，聽古仔係其次，最緊要搵到信任嘅人同安全地方同佢一齊瞓，因為咁先有安全感，人先會解除戒備，舒緩到精神壓力，就會瞓得着。」
法拉打乒乓波 出身汗
邊度教：《溏心風暴》
有無效：★★☆☆☆
未做啞妹之前嘅陳法拉，喺《溏心風暴》飾演中學生，某晚西史測驗前緊張到瞓唔到，最後要全家總動員陪佢打乒乓波。李寶能評：「如果平時有打開兵乓波，打得耐會攰會悶，咁就有效；相反十年未玩過，突然去打會有新鮮感，會更加瞓唔着。」
落難同鄉 唱K減價
邊度教：《迷失東京》
有無效：★★☆☆☆
過氣影星到日本拍廣告，遇上新婚少婦玩邂逅，兩個美國同鄉離鄉別井，適應唔到異地生活，搞到雙雙失眠，要齊齊唱K解悶。李寶能評：「唱K接觸音樂，如果慣咗透過唱K釋放壓力，咁就有效，但揀快歌或者串燒歌，會越唱越興奮，反而瞓唔着。」
杜馬𡁻香口膠 呃大腦
邊度教：《白夜追兇》
有無效：★★★☆☆
警官杜馬查案，錯手誤殺拍檔，自責瀕臨崩潰，無法入睡，食香口膠幫助睡眠。李寶能評：「有用！咀嚼會產生滿足感，食香口膠等於呃緊大腦。大腦以為食緊嘢，胃部準備消化食物，血液流晒入胃，腦部血濃度低咗，精神差咗睡意自然增加。」
Ben通宵打工 積極過龍
邊度教：《愛情回水》
有無效：☆☆☆☆☆
Ben同女友分手，耿耿於懷晚晚失眠，發現唔瞓覺反而每日多咗8粒鐘時間，索性去超市打工打發時間。李寶能評：「呢個問題幾嚴重，失眠原因可能正正因為主角有呢種性格，事事唔想浪費時間，唔係逃避問題，而係積極過頭，只會更加瞓唔着。」
嘉欣啪鎮靜劑 解燃眉之急
邊度教：《異度空間》
有無效：★★★★☆
林嘉欣疑神疑鬼，有精神病唔肯認，搞到失眠，全靠哥哥開粒鎮靜劑應燃眉之急，先可以大覺瞓。李寶能評：「用藥物平衡腦部精神傳遞物質，唔屬於治療，只係應急方法，對無信心控制自己情緒嘅人而言，係被動而有效，但我認為唔應該濫藥。」
珠姐做家務 攰到攤梳化
邊度教：《師奶股神》
有無效：★★★★☆
老公失業，珠姐擔心到失眠，惟有做家務做到攰先攤上梳化瞓。李寶能評：「師奶熟悉屋企環境，做家務好煩躁好重複，加上有體力消耗，又攰又悶效果當然好；但如果執執吓屋發現有趣事，例如搵番啲舊相慢慢睇，意外驚喜刺激大腦，只會有反效果。」
有「教」好瞓
金融海嘯加種種無形壓力，令唔少香港人失眠，數綿羊呢個方法，親身經驗過就知唔多Work，硬生生去記數字好頭痕，我仲試過越數越精神㖭。自己搞唔掂，不如請專家教路，學番兩招，以後咪有覺好瞓囉。
夫妻之禮
做愛可以治失眠，不過條件係靈慾一致，即係對象係要你全心全意鍾意嘅人，要想同佢有真正肉體接觸先至Work。城市人經常處於戒備狀態，夫妻做愛最放低戒備，雙方都得到滿足同安全感，加上體力消耗，做完愛真係可以大覺瞓。
帶氧運動
身體活動量不足導致失眠，應該做適當帶氧運動，例如Sit-up，做到有倦意為止，唔一定要喺屋企做運動，落街散步都可以。
睇書
唔好揀有故事性同刺激到思緒嘅書，例如小說。追睇有興趣情節，仲邊會有心情瞓覺？亦唔好揀好悶嘅書，睇到厭睇到火滾，變相影響情緒，盞到時瞓唔着。
聽音樂
聽音樂Work，但要識得揀歌，張如誠《友誼的光彩》呢類歌太有哲理，只會令人心跳加速，有故事性嘅歌一樣唔適合，因為會誘發人聯想，應該揀旋律和諧接近大自然韻律嘅音樂。
熱水浸腳
瞓唔着，可嘗試用熱水浸腳。腳部有個湧泉穴（腳板前三分一凹陷處），中醫認定經常按摩湧泉穴有助安眠，浸腳同時適當按摩穴位，可提供充足身體活動量，屬治療失眠治本方法。
我都有計
失眠喺香港咁普遍，相信每個人一定有一兩招獨門秘方傍身，一於集思廣益，問街坊有乜計仔先。
問題：多唔多失眠？有乜計治失眠？
放鬆運動
Jennifer：「以前都有，但好耐未試過。睇電視學到一招，先將全身放鬆，慢慢就會Feel到腳部好似有打圈嘅感覺，當慢慢放鬆到頭部就瞓到㗎啦。」
打NDS
阿茵：「唔算太多，間中一兩次；通常會打NDS，做啲嘢越傷神就越易瞓，或者煲吓超多字嘅小說。」
飲熱奶
Emily：「失眠呀，一時時啦。想瞓又Feel到自己好精神，飲杯熱鮮奶，真係幾有效㗎。」
大喊一場
Crystal：「我又無失眠，都幾容易瞓得着，所以都無乜特別方法。大喊一場啦，應該會特別好瞓。」
聽音樂
Fiona：「平時唔算多失眠，瞓唔着嘅話，我會聽吓音樂，或者睇吓書，過一陣就自然瞓到㗎啦。」
