阿爾克馬爾剛剛好贏3:0，《蘋果開倉》再傳捷報。
雷丁熱W失手，禮拜二作客般尼決再追。
燕豪芬又走樣，證今屆荷蘭足球屬亂局。
網誌日期：2008-10-27
從不憎人富貴厭人窮，人哋叻仔搵到食身光頸靚揸靚車，學唔到亦應投以羨慕眼光，相反亦不會踩多兩腳。但本欄常客──熱刺，上季攞到個聯賽盃，心雄起來，季前花了10億港元擴軍，兩個月後一場未贏過；光頭老板昨日竟把心一橫，再花數億港元來個大清洗，原來百年一遇嘅金融海嘯不見底，仲有球圈人個底子可以咁厚，進取指數，贏李首富拍得住畢菲特！
8場不勝，一次過玩「去西班牙化」用番老式英國領隊是否合理，自有公論，這個世界從來都係有錢嗰位聲大；我認為球隊季初大脫腳主要是班底太新，在季前熱身賽可以揚威，因對手鮮有在中場玩壓迫，令一班瘦弱自恃腳法了得嘅𡃁仔，可以也文也武，一到出賽，便知完全唔對路；其中跌watt最勁係賓尼同杜斯山度士，正選位都冇埋，其他唔係太差，包括我好敬重嘅上季荷甲鋼門靴里奴高美斯，但信心一散，可以完全走樣。
熱刺真係會降班，講都冇人信？可惜在上周四才公然話全隊撐拉莫斯嘅活基治，喺上周五話球隊正嚴重陷入護級危機，你做老細，仲唔嚇到腳軟？唉，呢次篤背脊唔怪得人，只怪呢位盃王，帶隊踢足協盃又輸波。
阿仙奴之前輸畀侯城，好羞家，現在侯城仍排三甲，究竟證明有啲有錢人搞波戇居，定係侯城真係老虎。
http://hk.myblog.yahoo.com/appleballmen/
蘋果波神個人資料
英國足球狂熱，願能年年去朝拜。
（逢周一至周五見報）