GoogleG1抵港　SIMLock即破！

美國時間22號（本港上星期三深夜），Google手機G1正式開賣！鎖SIM、出機簽約等老規矩，翻版iPhone政策再度出台；不過當地網絡商T-Mobile唔似得AT&T咁自私，只要肯畀多220美元（即399.99美元，約3,120港元），你就可以買齋機兼無約跟身！既然唔使鬼崇出機（利用美國人身份證上台），首批約50部水貨星期五晚已極速抵港，落地價即炒上$5,680，比建議零售價勁貴八成！

記者、攝影：陳國輝
鳴謝：Like

插SIM前做手腳

出機免上台，最大好處係間接幫香港用家，唔使硬食一大筆「無謂台費」，兼唔使俾班水貨佬，乘機抬高機價；不過G1仍面對SIMLock問題！即係話就算你放張香港SIM卡落部機，根本就用唔到！
點算？原來解機佬已為每部機「特製」咗一張TurboSIM，只要將佢夾埋張本地SIM卡一齊用，手機就會誤以為你用緊T-Mobile網絡；就如早前一系列日本機咁，據講成功率仲幾高！另一樣要留意，首次開機時必須輸入用戶嘅GmailAccount，然後先能夠Unlock，雖然手機亦提供CreateNewAccount，但步驟繁複兼嘥時間，預早搵電腦搞掂好過！

■開價$5,680，好得人驚！

■機身長闊厚都好接近，只係個芒稍為細啲。

唔上網即變垃圾

G1最把炮係採用Google開發嘅新系統Android，最大特點係全開放式，任何人都可以自己編寫程式，放上網俾人單撈！冇錯，比起iPhoneAppStore而言，佢好處係完全免費，當然，壞處則可能會出現大量無謂資訊，例如廣告之類，不斷騷擾玩家。
但如果玩G1而唔上網就真係冇乜用，佢內置好多服務，如GoogleMaps、AmazonMP3Store同埋YouTube等，全部為上網而設，假如買部機只為影吓相或者ShowOff自己，咁真係嘥晒！