趙碩之、木村乃、官恩娜（Ella）、可嵐、尹蓁晞、戴夢夢及有「翻版徐子淇」之稱嘅曾麗儀等，噚日現身尖沙嘴出席「giVIPShoppingDay」活動，一向以性感掛帥嘅趙碩之初到場嘅時候鬼咁密實，但發現俾着低胸裝嘅木村乃搶晒風頭，心有不甘，即時喺商場店舖內揀衫玩變身，換番條低胸裙搏過，佢試穿鞋嗰陣仲有意無意地咁烏低身嚟搶鏡，馮仁昭覺得佢真係幾搏命。
Ella自封獨孤精
木村乃仲寸寸哋咁話：「我着嘅係普通衫，唔知道咁樣係性感，平時都咁着，不過有時行街就會俾啲男人話我好大波，搞到我好尷尬。」
此外，Ella啱啱出唱片，其中1,000隻特別版CD已經賣晒，問到佢嘅「好友」有冇買碟支持？佢煞有介事咁：「我冇朋友㗎喎！」俾記者笑指佢係獨孤精時，Ella又話：「我以為你問我嗰個人（緋聞男友陸恭和）嘛！總之我身邊所有朋友都有買啦！」
