「0分……」有無搞錯！話NissanTeana0分？唔少人抗議啦！咪激動，未講完呀，係0分貝呀！喺車櫳入面，靜到暈，若然大家唔出聲，絕對有零音效嘅情況，誇唔誇呀？唔誇！唔係親身體驗過都想像唔到行車都可以寧靜得咁嚇人！
記者：梁美甜
攝影：譚盈傑
Model：Tiffany（TheGroup）
高級流動梳化
Teana喺香港係全新登場，之但係同款車，喺日本由03年推出至今已經係第二代，新車當然秉承Cefiro豪華舒適嘅傳統，但外形設計上，就更趨向高級豪華行政房車款，好似一提起Benz，大家自然聯想到高級舒服一樣。穩重外形、大大個鬼面罩加全真皮座椅等，無論外形線條或內裝舒適裝配，全新Teana都較上一代走更高級房車路線。新車較之前長多5mm，達4,850mm，整體感覺更修長，加上大而獨特鬼面罩，一睇就知係Nissan。頭燈用上一體式設計，燈與車頭設計融為一體，仲加入霧燈、鍍飾同車尾LED燈，再搭配全新雙天窗天幕玻璃頂，為呢部中型房車營造出高級豪房味道！
觀感高級，觸感又如何？全部座椅用上真皮之餘，前排兩個更是電動Ottoman座位，加埋冷暖氣通風系統，熱辣辣暴曬粒幾鐘之後，一坐上車，開着冷風系統，凉風由座椅各個窿仔吹入衣物內，凉快得很，拍得住歐洲高價車，爽噃！後排仲誇，門邊裝有兩個巨型手枕，令座椅好似屋企張梳化咁，唔單只隻手有地方Hea，攰攰哋時，直頭可以當佢頭枕咁瞓落去，再加上引擎波箱底盤出色，行車靜到暈，坦白講，嗰種感覺舒適到你想瞓！就算停咗車，同攝影師兩個人都無意思落車，Hea到瞓，唔係有工作人員催住話係禁區，兩個人都唔想落車開工，呢種心態真罪過！
偈靜，有計！
Teana中文名叫「天籟」，可以睇得出代理對新車嘅操控、舒適寧靜度都有絕對信心。又難怪，新車用全新D-Platform底盤，即係以大量輕量兼高剛性嘅精鋼打造，加上大量隔音物料，2.5公升V6引擎馬力輸出高達182匹，性能好轉波順滑，又醒目地用上大量舒服內裝物料，成部車咪就係靜得舒服喇！揸嗰個會Feel到係揸緊部似高級行政房車咁嘅中型房車囉！
而VQ系列嘅2.5公升V6偈車型，低轉時已可釋出80%扭力，配合CVT新增嘅ASC功能，車身能醒目地自行根據紀錄，選取合適波檔行車，慳番唔少動力又慳番唔少油㖭！官方提供平均耗油量約12km/L，即大約每公里個零銀錢，若然係，呢部咁高級嘅豪華舒適度房車，對對手Camry同Accord嚟講，呢場絕對係硬仗！
話你知 換湯不換藥
講Teana，一定要提Cefiro；提Cefiro，大家一定聯想到部車係幾咁舒服！係，Cefiro即係日本本土嘅Teana，換句話說，即係有番咁上下行政外形兼有豪華舒適內裝喇！Teana亦無令大家失望，（首次登陸香港，換咗個名），內裝依然豪華舒服，性能仲大升級，保留咗行政豪華格局嘅同時，棄Cefiro嘅2.4V6偈搭配四前速波箱，換上全新嘅2.5V6CVTC引擎搭配XTRONICCVT波箱，起步加速更順滑，之前已經行車寧靜，𠵱家就更加靜上加靜，最緊要嘅係CVT波箱耗油量低，為荷包慳唔少喎！
規格
引擎：2,495ccV6CVTC
馬力：182ps/6,000rpm
扭力：23.7kgm/4,400rpm
傳動：XTRONICCVT，前驅
尺碼：4,850×1,795×1,475mm
軸距：2,775mm
查詢：合誠汽車（28035333）