前晚我求大俠去餐廳睇「拖肥糖」對紅魔，班紅魔躉一見到基斯坦奴朗拿度（C朗）掂波就噓到七彩，尤其係佢射罰球門框都唔中，就更加激氣到「問候」佢屋企人；睇嚟C朗遲早同曾特首一樣要接「蕉」。
表現倒退 成日恨攞獎
話晒C朗上季係奪標功臣，因乜解構搞到班紅魔迷都憎佢呢？上季C朗係踢到曉飛，弊在佢暑假鬧轉會，同皇馬眉來眼去，搞到紅魔迷好不滿呢條二五仔。好喇，開季前肯乖乖哋留低，又實牙實齒話長留曼聯呢間偉大球會。
結果？講就天下無敵，做就有心無力，復出後幾場都冇乜表現；間中鏡頭捕捉到嘅，都係一啲誇張都冇人信嘅詐傷表情，冇角度嘅罰球、冇力度嘅射門，上季嘅射門觸覺完全失靈。
無他嘅，雖然「插花王」上季贏盡所有獎項，但貪心嘅佢得一想二，對年底頒發嘅金球獎虎視眈眈，直頭志在必得。面對有歐國盃同西甲聯冠軍在手嘅卡斯拿斯、贏完京奧又「弗」到漏嘅美斯，仲有喺國家隊同利物浦都咁出色嘅費蘭度托利斯，C朗唔驚就有鬼啦！接受西班牙《馬卡報》訪問時，佢仲發表偉論：「如果將金球獎頒畀美斯，簡直就唔公平！」恨獎恨到發燒，難怪踢波心不在焉。
花花公子 忽然玩失戀
另外，C朗雖然女伴多多，但冇一個留得住佢，就算俾狗仔隊影晒相斷正，呢位花花公子都唔承認對方身份；仲先後飛咗西班牙女友妮莉達同意大利情人菲莉比，向傳媒澄清自己單身。記得上季佢識咗妮莉達時，求戀期有愛情滋潤特別生猛，入波仲向看台女友飛吻，非常風騷。𠵱家玩失戀，自己都踢到無癮，全場黑口黑面，唧都唔笑！
球場情場同樣失意嘅C朗慘變雙失青年，再踢得咁差，唔知出街會唔會俾球迷掟香蕉呢？