炒股好日子過去，開源唔得就要節流，內地網友提倡「百元周」，即係一個禮拜返工嗰5日只使100蚊人仔（下同）。要知道內地消費雖然平過香港，但之前因為通脹，物價都貴咗唔少，平均每日用得嗰20蚊，其實唔係咁易。
內地網友鬱悶昊早喺年中已經發起呢個「百元周」，家陣經濟咁差，響應嘅人自然更多，參加嘅人要喺網上公佈每日使咗幾多錢。好似網友小梅愛豆豆龍其中一日嘅消費係：早飯唔食，坐車4蚊，午飯8蚊、生果4蚊、晚飯食隔夜餸，呢日只係使咗16蚊，仲有4蚊可以儲起㖭。
其他網友亦提供慳錢貼士，91403本嚟食開泰國靚米，因為入口米價錢勁升，一時間轉食國產米又嫌唔夠香，所以泰國同國產米各半溝嚟煮，實行慳得一蚊得一蚊。