小YY嘅工作時間太長，經常每日十二小時，久唔久又要當夜班，睡眠時間唔穩定，呢日佢放工後覺得好攰，返到屋企立即梳洗上床，換好睡衣，打個大噴嚏，肩膊肌肉抽一抽，不以為意，倒頭便睡，點知第二朝早上六點想話起床返工，先發覺頸與膊頭動彈不得，痛到飆眼淚，好彩手機放在床頭，勉強打到電話搵媽咪求救，媽咪立即飛的士去到小YY屋企，小YY夾硬碌落床去開門，此乃一人離家獨居之風險也。結果點呢，長話短說，媽咪扶住小YY，好不狼狽咁落街坐的士去醫院，急call相熟老友記骨科專家Ｃ到醫院診治。
醫生Ｃ睇過Ｘ光片後，話此乃工作疲勞過度，肌肉拉到緊一緊，導致頸骨、脊骨扯到直晒，冇晒弧度，故此病人覺得好痛。好彩骨骼無損，吃藥、睡眠、做物理治療，留醫一晚，次日便可出院，原來打個噴嚏都可以搞成咁，而且不限年齡㖭，左丁山聽咗都覺得幾新鮮。以前有位老友約五十歲，朝早刷牙上身半彎向前傾、右手握牙刷，點知打一個大噴嚏，就好似被武林高手點咗穴道咁樣，上身不能郁動，老婆畀佢嚇親，嗌埋仔女幫手，抬佢上車入醫院。
賓架Ｗ知道小YY入醫院，立即送佢兩本小書，一本名為TreatYourOwnNeck（治頸），第二本係TreatYourOwnBack（治背），作者名RobinMcKenzie，書內介紹好多種坐、卧，舉物等等正確姿態，以及自己治療自己嘅方法。賓架Ｗ極力推薦，話佢自己打咗多年網球、高爾夫球，頸腰背皆有不同程度嘅傷痛，睇醫生次數甚多，久病成醫，認為呢兩本書極有參考價值，小YY等年青人應該細心閱讀、學習，跟住本書做練習，不可偷懶。
腰痛、頸痛、背痛，本以為係五十歲以上人士嘅病痛，誰不知年青人如小YY亦會患上，大抵平時生活緊張，工作時間長，經常垂頭對住電腦螢光屏工作者，皆易患背頸肩痛病，賓架Ｗ仲介紹佢親自用過嘅InverseTable（無高血壓者方可使用）話治骨刺有用，可惜此「牀」佔地達三乘六呎，一般香港睡房難容兩張床，未買之前已經大傷腦筋！