民建聯曾鈺成早排唔遵守佢話做咗立法會主席，就唔評論時事嘅承諾，噚日又現身亞視英文台嘅《時事縱橫》，仲喺節目中話自己已遵守承諾，即係唔會講一啲會引起爭論嘅話題，唔知道班議員聽到有乜感覺。曾鈺成喺個節目話對毓民掟蕉唔意外，因為當日一早有立法會職員話佢知，有議員擰雞蛋同香蕉入議事廳，佢同煲呔開會前仲討論過點處理。曾鈺成話煲呔當時講明，如果有人掟蛋，主席就應該暫停會議。
聞共產黨即講耶穌
曾鈺成又話，如果當日毓民出蕉掟中煲呔，可能係刑事罪行，因為權力及特權法只保障議員喺議事廳內言論自由，唔包括呢種行動，又話相信大多數公眾都唔容認咁嘅行為。主持又問佢係咪共產黨員，佢就轉移焦點話問題係陷阱，答係同唔係都會俾人鬧，但就若有所指咁引述聖經，話彼得曾經三次唔認耶穌，當彼得叫耶穌做救世主時，耶穌叫彼得唔好講出去，直至耶穌釘十字架，彼得至同人講耶穌係救世主。曾鈺成答得咁玄，唔知有幾多人明。