全球經濟衰退，企業裁員消息時不時傳出嚟，好多中小企都嗌晒救命，希望銀行放鬆水喉，不過，唔係行行都要縮皮，好似快餐業就逆市擴張，因為經濟不景，平民快餐當旺。家陣再多一行生意好做，邊行？咪金舖囉，上個禮拜金價急跌，每盎斯一度低收至721蚊美金，插至一年前低位，吸引唔少市民買金保值。
睇新華社報道，泰國曼谷爆發搶購黃金熱潮，上個禮拜五、六嘅曼谷唐人街，唔少華人蜂擁去金舖搶購金飾。據外電報道，當地多家金舖嘅金條，更俾人搶購一空。
雖然家吓泰國政局動盪，都唔使趁金價大跌瘋狂搶購啫，不過可能唔少當地華人都擔心高通脹持續，再加上市場成日謠言銀行唔掂，所以都係覺得買金保值最安心。唔知搶金熱潮幾時會吹到嚟香港呢呵？