喺大自然面前，人變得渺小，同樣喺金融市場面前，人亦非常無助。
記得今年初，敏妮相熟嘅視光師想買樓結婚，問敏妮意見，當時敏妮只係叫佢睇定啲先，唔好咁急。敏妮冇水晶球，當然唔知家陣樓市低處未算低，當時純粹認為結婚唔一定要買樓，因為結婚同買樓係兩項唔同嘅投資，要獨立考慮，兩者最大關係，應該係當樓價跌時，兩夫婦都會唔開心，分分鐘影響雙方關係。
結婚唔一定要買樓
前幾日陪媽咪去換眼鏡，見到視光師，佢慶幸自己仲未買樓，家陣可以有好多選擇。不過，佢同敏妮講，有個朋友，因為前排見樓市跌，心儀嗰層樓到價，所以入市。點知家陣坐向更好，面積仲大，簡單講，佢更鍾意嗰層樓，賣得仲平過佢買咗嗰間，所以佢喺度盤算緊撻定。
咁蹺敏妮星期六喺屋企睇電視，有個講樓盤嘅節目，又講到有關撻定嘅潛在損失，可能唔止淨係定金咁簡單。買樓唔同買棵菜，買樓撻定所損失真係唔止定金咁簡單，買樓通常要簽臨時買賣合約，同正式買賣合約，如果買家喺簽咗正式買賣合約之後反悔，除咗損失定金、地產代理佣金，仲會俾業主追悔約嘅損失。你知買家撻定，好多時都係因為個市跌得甘，如果個業主再將層樓賣出去，又賣唔番當時賣畀你個價錢，業主有權要你賠番個差額畀佢。
撻定唔止蝕定金
莫講話小投資者，就算係大鱷炒家，喺大市面前一樣渺小。所以做錯決定，當機立斷面對係值得支持，不過，當計過數，知道唔玩原來要即時面對損失，好多人都唔肯認輸，希望大市逆轉，甚至想奇迹出現唔使蝕，結果可能蝕得更多。幾時認輸放棄？可能係好多人家陣每日頭痛嘅問題。
溫敏妮
http://wanmanli.com/blogs/