股災一到，一眾股神都封口唔敢估市，偏偏網友hkft冇有怕，早喺9月預言09年港股會大瀉，恒指會跌到1萬點，叫大家小心！
呢位自稱叫賴生嘅網友話：「特區政府屬亥水，最怕就係土（丑未辰戍）。」佢舉例之前全球政府集體救市，環球股市明顯反彈，但到15號港股急跌，三日內跌落萬四點左右，呢一日嘅天干地支正係土。佢仲攞歷史嚟證明，話00年科網股爆破，跌得最甘嘅3月29號，正係土年土日。
牛年羊年總有巨災
賴生睇完五行又講易卦，話香港逢牛年羊年必有巨災，龍年狗年都較差。97牛年有亞洲金融風暴，00年龍年科網股爆破，03羊年有沙士。照咁推算，09牛年香港會再有巨災。佢話香港經濟會再挫、禽流感重臨、民怨爆發，有高官要下台！
網友john080896問佢：「下星期有冇反彈？請卜支卦。」不過賴生冇回應。pigdog神就唔多信，「唔好話用五行術數推測（個市）唔掂，就算照𠵱家環境推測，明年都唔會好得去邊。」