面對全球金融海嘯，政府財金官員都要昅實，睇少一陣都怕出事，財爺鬍鬚曾仲講明話當正打仗咁。但如果係打仗，作為一支軍隊嘅特區政府，領軍嘅煲呔同任總唔啱牙，而主力部門、財爺手下嘅財經事務及庫務局副局，都搞到有啲官員唔妥另一啲官員，大家認為，呢場仗贏面有幾大呢？
所有局長文件都要睇
早排一句「用盡晒彈藥」，搞到人心恐慌，令好多人對呢位財經事務及庫務局副局長梁鳳儀另眼相看，佢講到咁盡搞到鬍鬚曾都要跟手補鑊，不過呢位政治新貴仍然信心爆棚，同佢有交往嘅官員話，新貴仲認為自己講得好，完全冇錯，對於俾人批評講嘢越權，因為只有財爺至可以講動用港府儲備救市嘅問題，新貴更加唔當一回事，繼續也文也武好似隻蟹咁打橫行，喺財庫局同成班AO搞到好唔妥。
梁新貴係𠵱家特首紅人特首辦主任攞命陳嘅師妹，都係出身金融管理局，政府請副局長，就係攞命陳in佢。喺金管局時候，梁小姐出名搏晒命，眼中只有一人，就係老闆，但做佢下屬或者同事就好辛苦，一開聲同人傾嘢就好勞氣咁款，搞到好多同事見到佢都怕怕。𠵱家空降政府，雖然係新人，但作風照舊，一貫女強人本色，但局內嘅AO就唔慣咁嘅方式，譬如佢叫人將所有畀局長嘅文件，都要畀一份佢，AO當堂凸晒眼，佢有乜資格咁做啊，梁新貴一於少理，仲將AO當馬仔咁鬧，搞到辦公室氣氛都幾僵吓。
呢個局除咗副局長，仲有另一個政治任命新人，係對國籍問題表現強硬，堅持唔放棄新加坡護照嘅政治助理坡妹伍潔鏇。坡妹相對溫柔好多，但有AO見到坡妹已經變成阿四，成日畀梁新貴點嚟點去，所以無論表現成點都畀足同情分畀佢。
局內有個高官就快退休，職級高過梁新貴，仲直接由局長陳家強指示，唔使聽新貴支笛，佢睇唔順眼自己嘅AO同事受難，向秘書同同事講明，唔會接梁新貴電話。公務員事務局局長俞宗怡一直都唔肯出嗰本公務員守則，講清楚公務員同政治任命官員嘅分工，𠵱家副局同AO嘅磨合搞成咁，唔知俞小姐點諗。
mailto:[email protected]