第一上海（227）由上年9月高位4蚊樓上，掟到落家陣挨近沙士價，跌咗87%，又係殘到不堪，可以兜番轉。上年港股一支箭，第一上海最高見4.18元，當時P/B講緊兩倍水位。集團股價經呢1年狂插，最新NAV1.83元，現價（0.51元）折讓高達72%，P/B得番0.28倍，折讓吸引到爆。
要咁睇，證券股上年瘋狂，全因為市場憧憬「港股直通車」到站。呢個中長線潛在利好因素，家陣提都冇人提，但唔代表唔存在。再講，北大人為抗金融海嘯，相信短期內會再有刺激樓股措施出籠，市內可以經營祖國B股或相關證券業，暫時得第一上海同申銀萬國（218），新一輪救市措施出籠，亦應該以呢兩家證券股嘅股價反應最快。但後邊申銀，家陣P/B仲企1倍樓上，講折讓，都係第一上海抵買。博集團衝番上月頭1蚊高位，現價潛在升幅96%，P/B未有耐到1倍。
慶鈴現金多折讓大
慶鈴汽車（1122）揸住淨現金，高達40億銀人仔，銀碼嘅晒士，絕對唔係嘢小，財政狀況肯定好過好多家內房股。賤物鬥窮人，跌市時，股票一樣。慶鈴呢個月質穿近4年長城鋼價1蚊之後，一路狂插，啱啱創埋8年新低。每股淨現金1.86元，係現價（0.60元）嘅3倍，而NAV折讓，亦係講緊高達81%，股價殘到咁，離晒大譜。照樣計數，慶鈴現價翻一番，上番1蚊水位，仲差每股淨現金值幾條街咁遠，怕乜買？
錢雋