自由黨新領導層前日誕生，噚日即刻出擊，搞咗個「救救中小企」諮詢大會，請嶺大公共政策研究中心主任何濼生演講，中小企老闆水深火熱，對學術理論冇乜興趣聽，有老闆更直指何教授講嘢唔到題，氣氛都幾尷尬，好彩自由黨搵咗個靚女做主持，令一班廠佬開心番。
轉行做理財策劃
呢位令廠佬下火嘅女子，就係98年港姐亞軍趙翠儀，原來佢係自由黨員！據自由黨人透露，呢位前港姐入黨約兩年，不時有幫手主持黨內活動，日後會否參政無可奉告。港姐明顯受歡迎過學者，一眾中小企老闆睇落好冧趙翠儀，會後好多人搵佢握手，有人更一握就幾分鐘，甚至約佢食飯。
趙翠儀已經唔係電視台姐仔，唔使去飯局。佢當選後星運平平，喺娛樂圈冇發圍，浮浮沉沉半紅不黑，後來索性轉行做理財策劃，現時係高級副總裁。佢去年底同律師岑漢和結婚，聲言計劃出年生BB。好多港姐投資有道，隨時一擲千萬元買大屋，趙翠儀都幾犀利，聲言3蚊買入中國人壽。自由黨有個港姐亞軍，勁過公民黨有個唔入圍港姐陳淑莊。