要數立法會內口才了得嘅女議員，卿姐一定榜上有名，事關佢有姿勢有實際，面對住諸如煲呔同任總等高官都唔會怯場，唔使拎住份稿都可以窒到班高官冇聲出，功力真係有番咁上下。卿姐噚日應邀出席一個萬聖節講故事比賽時，身為評判嘅佢就向班小朋友傳授講嘢心得，令到唔少小fans滿載而歸。
卿姐覺得，如果講嘢要有說服力，最重要一點就係由心而發咁講出嚟，但係之前當然係要將啲內容消化咗先，唔通真係照稿講咁死板咩？其間佢仲主動爆料，話唔單止好多議員拎住稿讀都怯場，仲話有個議員仲試過讀讀吓份文件，無啦啦講句「飲啖水先」，但當時佢又唔係真係要飲水喎，事後發現原來係呢位議員嘅助手準備文件時，打咗呢句話落去，提醒議員喺呢個時候飲啖水，點知個議員諗都冇諗就照讀出嚟，好明顯係因為冇咪過講稿而大出洋相啦。
雖然唔知班小朋友學唔學到卿姐一成功力，但卿姐已經讚佢哋好叻，事關佢哋嘅表演好淡定，好過唔少議員。今屆新人好似Tanya同鼠王芬第一次發言都係照稿讀到口窒窒，睇怕都要向卿姐請教一下。