經濟唔好，好多香港人都受影響，惟有勒緊褲頭過活，有錢搵嘅地方好似投注站咁，但凡開六合彩或者跑馬日都大排長龍，希望可以刀仔鋸大樹贏一筆橫財。八方噚日行過佐敦，見到有間聯誼會門口聚咗幾十人等打麻將，原來呢度舉行一個叫「超級盃麻將大賽」香港地區選拔賽，希望用500蚊報名費博250萬冠軍獎金。
主辦機構都好識搞噱頭，以「經濟不景氣、翻身靠手氣」口號作招徠，冠軍獎金有250萬，咁吸引八方一度想交500蚊報名參賽，但入到聯誼會見到第一屆世界麻將大賽冠軍許宗澧，同埋今屆季軍林浩楠，信心馬上唔見咗九成九。「超級盃麻將大賽」下月喺澳門金都酒店進行決賽，睇吓邊個雀王可以拎走冠軍啦。