我不是以襯衫襯得叻馳名的，但我應承過自己，如果儲夠1,000個人問我「你平時點樣揀衫襯衫㗎？」那麼就證明了我襯衫的方法就算不是真的很有參考價值，至少也是很多人希望從我身上八些東西，8貨中8客，當是正面教材反面教材都好，如果這麼多人問，講出來大概總有點用吧。
未必一句講得晒，但趁我記得，有幾多寫低幾多，逐點逐點，縱未完整，好歹是張地圖，盡量替大家省點寃枉路。
今天先來兩段小故事三個重點。
1.韓國泡麵的啓示
我又身陷奇怪的處境了。今次我在超級市場的調味品櫃前，面對幾百枝不同牌子的豉油，呆立，並非因為自己初入廚分不清「生抽」、「老抽」、「草菰老抽」、「御品醬油」、「頭抽」、「壽司豉油」、「蒸魚豉油」與「無鉛老抽」……我，來到這裏，靜靜話你知，是因為間諜活動。
剛才在「絹豆腐」的水缸前唔覺意偷聽到中女姊妹的對話，自己雙腳就不受控制，忍不住吊住佢哋尾，只因戴眼鏡那位語氣較似家姐的講了句：「……我陣間介紹隻韓國即食麵過你嘆吓吖，嘩，嗰隻嘢，我次次開完OT返屋企，見到佢就開心，煲煲滾水等佢三分鐘，啖湯甜到呢真係冇人有，完全唔似即食麵，嘩，如果再『瀋』一執芝蔴或者黑椒落去呢，我就真係魂魄都唔齊囉。……」世間上如果真有這樣好味的即食麵，都不枉我扮冇嘢跟足全程，陪這對其實唔認識的中女姊妹遊花園遊足十分鐘，卒之蕩到去即食麵的貨架了，終點在望。
但企正陌生人隔籬偷睇人買乜嘢似乎太猖狂，於是我提早轉入早一排的調味品架，偷聽這個被人哋家姐形容得咁神奇的韓國即食麵，到底是那一款，這一招偷聽，大概可以叫「隔油買麵」吧。
「呢呢呢，咪呢隻囉！」
我要等她們散去，才可回尋寶地點。
但當兩姊妹聲音漸遠時，我來到即食麵專櫃，才知大劑，嘩，原來呢間supermarket賣的即食麵，單計韓國出產的，都有60款，究竟那一款才是中女姊妹口中的「魂魄唔齊」呢？為了這個麵我跟蹤到呢度才跟甩，係咪有啲唔抵？
追！惟今之計，只有追回那兩姊妹，看看她們的手推車上放的是那個款式的即食麵。
我推着自己的手推車，論論盡盡地繞場一周，最後在收銀處前大隊才找得回那泡麵姊妹花，但係，頂，啱啱就係職員幫她們將最後一件物品放入環保袋，收錢找錢的一秒，我搞了半天為了得到一個好味的麵餅，最後只得個桔。
所以，從此，當我想要一樣嘢，我一定會不恥下問，即使是在街上截停陌生人冒着被當成儍佬的可能，也在所不惜。
而且，更早便更八卦更眼利，入到時裝店，先看人家在試甚麼買了甚麼，入到人哋屋企，總要求參觀衣櫃……
要穿得好襯得靚，首要條件是要知啲嘢喺邊度搵返嚟，正如煮席好菜關乎於最美味的食材自那兒找，這點修煉不能懶。
2.錦衣夜行記
家人夜半兩點七換衫出街，我睇一睇，咦咦？N.Hollywood灰色針織長袖衫，Dsquared2卡其Chinosroll埋腳，再加對Gucci啡色鱷魚皮loafers？
嘩，我問咁夜着得咁靚去邊？
佢話，冇，漏咗份嘢喺office十分鐘之內即去即返。
咁使唔使咁靚？
咁一出手就係襯得咁靚，本能嚟嘅，修養嚟嘅，唔通專登襯得肉酸啲？
冇人見到嘥唔嘥？
一啲都唔嘥，當係襯衫練習最好，平時喺河北省金川鎮體育館，喺冇觀眾情況下也揸正嚟做練練練，他日參加奧林匹克上鳥巢才不會在幾千萬人面前失手啊！
啊，有道理有道理！所以今日開始在家裏穿了T恤運動褲我都襯一襯先得。
本周貼士：
不要因為「着咗唔出得街」而唔試某一些衫，對，有些衫你一看就會問「點搭地鐵呀？」「着去邊呀？」，但回心一諗，不是這樣的怪衫，即是「着去邊都得的衫」，你還有那一個款那一個色未擁有未着過，這些衫你已經日日着而且不干預的話會着到百年歸老，你甘心忿氣嗎……
要着衫襯衫所謂進步，必須由你未試過的東西組合開始，即係你以為「唔着得出街」的衫，如果需要練大自己個膽，由萬聖節開始吧。
夠膽扮喪屍木乃伊出街，遲啲你會夠膽着RickOwens和Balenciaga了。
HappyHalloween！
Textby：黃偉文
