煲呔噚日突然宣佈擱置生果金資產審查建議,咁大件事,好多人都想深入了解為何煲呔會180度大轉軚,煲呔似乎都想解畫,與傳媒高層開吹風會,點知佢又老董上身,開吹風會都玩親疏有別,只係向個別友好傳媒講述轉軚心路歷程,《蘋果》同幾間傳媒機構都冇份聽佢表白心迹。
提高生果金同是否引入資產審查係重大政策,堂堂特首卻選擇性吹風,唔敢公開向廣大市民交代,剝削市民知情權。當年老董最愛玩呢招,結果玩到腳痛下台,煲呔聲言自己係「政治家」,身邊智囊月薪加埋以百萬元計,竟然容許佢自尋「腳痛之路」,真係耐人尋味!特首辦中人解畫,指煲呔定期約見傳媒高層,噚日只係巧合遇上生果金呢單嘢啫。八方聽聞有樣嘢仲巧合,就係禮賓府巧合地噚日下午先call傳媒吹風,剛剛遇着啱啱,又唔見煲呔中六合彩!