成家立室前人人要去舊迎新，踏入結婚旺季，美容院及所謂修身中心特別旺場，燕窩魚子七色facial、香薰草球熱石SPA，加上近年打入女性巿場、還原基本步的上海擦背，看得人眼花撩亂。中西醫均認為，聲稱可以去死皮、排毒兼「脫胎換骨」的上海擦背，對健康其實無甚裨益，若本身有傷口或者濕疹，更可能令皮膚感染，必須三思。
記者：張嘉雯
小時候，世界沒有死皮，更沒有去角質，只有最原始的老泥；時移世易，老泥有了尊貴的名字，而專門對付老泥的上海擦背，亦由男士澡堂的粗獷玩意，搖身一變為新娘子結婚前最後衝刺的「Musthave」護理。
將皮膚保護膜磨走
皮膚科專科醫生王夢貞則認為，身體健康的人，根本沒有必要做上海擦背，「一般人死皮層唔會好厚，除非唔冲凉或者食緊一啲令新陳代謝減慢嘅藥，如果唔係都唔使特登去擦，唔磨唔會病，只係可能手踭啲位置會厚啲硬啲，無咁好睇啫。」
她又指，擦背的過程中，可能磨損表皮層，若堅持嘗試，必須留意技師雙手及用作擦背的毛巾是否清潔，「大力擦背會將皮膚天然嘅保護膜磨走咗，就算係小量細菌同真菌都可以感染皮膚，好似MRSA（抗藥性金黃葡萄球菌）、疣或者灰甲咁，仲要加埋用力，就更加容易入皮膚，令皮膚發炎或者皮下脂肪感染。」
本身皮膚有損傷或者濕疹患者，表層角質會較薄弱，免疫系統較差的人士，例如糖尿病患者，更不應該擦背；一般人則要特別注意腋下、大腿內側及頸等位置，因皮膚較薄，「有啲人會覺得越大力越好，甚至覺得痛同紅先收貨，但係其實如果紅咗，即係好似曬太陽咁，已經係輕度灼傷。」
註冊中醫師譚子勁亦指，按摩可行氣活血，但不能達到排毒的效果，「中醫所謂毒，係講緊紅腫熱毒嗰啲毒，或者風同埋濕毒，要用藥嚟處理，外面按摩無乜害，亦都無乜效，死皮平時冲凉都清理到，唔使特登去磨。」
非常護理
拔罐最牙煙 曬燈高風險
工作壓力大，人人陰虛火旺做護理，上海擦背帶來皮膚感染並不驚人，皮膚科專科醫生指，當今最「牙煙」的三大護理分別是拔罐、曬燈及果酸換膚；不少巿民膽粗粗自行拔罐，仿效醫師手法，用火燄輕灼玻璃罐，達至真空效果，結果嚴重灼傷皮膚，成為危險護理之首。
皮膚科專科醫生王夢貞指，有巿民自行拔罐，被火灼傷，結果要送院治療，呼籲巿民不要嘗試，「因為要用火，可能會留疤痕，我都有個親戚試過喺屋企自己拔火罐，點知燒傷，結果要兩個幾月傷口先埋到口。」
自行拔罐被灼傷
排名第二的危險護理是近年非常流行的太陽燈，「越後生開始曬燈，第日出皮膚癌嘅風險就越高，曬燈因為要快見效，UV（紫外光）劑量就更加強，曬傷嘅風險就會高。」
果酸換膚原理類似上海擦背，但危險性更高，因為若果酸濃度太高、使用次數太密，會令皮膚薄弱及過敏，「褪皮褪得太多，遇到咩敏感原，就會令皮膚短時間紅腫。」
本報記者
