𠵱家做香港人都好慘，之前有毒奶事件，𠵱家又有金融海嘯，出街食嘢又貴又驚中毒，搞到成個社會氣氛人心惶惶。小妹早幾日同同事小貴子傾開，佢啱啱結婚，朝早有老婆親手炮製愛心早餐。佢仲話最近買咗部豆漿機自製豆漿飲，又浪漫又健康，唔使飲埋啲三聚氰胺黑心奶。
佢話做法好簡單，只要夜晚臨瞓浸咗杯黃豆，第二朝起身將黃豆再蒸約30分鐘，然後將啲黃豆加入三杯水再注入部機嘅容杯入邊，再加糖或者係薑，怕肥就唔好加糖嘞。㩒個掣大約等5分鐘，咁就有新鮮美味嘅豆漿飲嘞。
小貴子仲話，佢打算買麵包機、乳酪機咁，係屋企同太太煮飯仔，自製麵包、蛋糕㖭，增加生活情趣咁話。
含有豐富蛋白質
不過，呢啲家電都唔平㗎，靚啲嘅豆漿機講緊成五千蚊，麵包機大約千幾蚊，乳酪機大約二百蚊。
小妹問過養和醫院嘅營養師陳勁芝，佢話豆漿有豐富蛋白質，以一杯250毫升計算，大約有7克，每日大約飲兩三杯就夠，不過，黃豆本身無鈣，所以自製嘅豆漿係冇鈣嘅，而外面賣嘅預先包裝豆漿就加咗鈣。所以消費者自己製豆奶，記住要補充番啲鈣。
逢周六、周日刊出
電郵：mailto:[email protected]