搶試《街霸4》EX春風腳力壓全場

除噚日介紹過嘅《生化危機4》外，Capcom王牌Demo仲有隻《街霸4》到港，不但基本16人全部有齊，連街機Unlock無耐嘅豪鬼，以及剛公佈嘅新角色春日野櫻都有得玩，兩大新人即時交鋒，本以為櫻花雞手鴨腳無得鍊，點知一招EX春風腳易出兼易駁招，掃到對手失晒魂！

文：之達
攝影：林栢鈞
協力：徐影龍
鳴謝：CapcomAsia

越加越齊人

街機版大收旺場，Capcom喺家用版一樣落足本錢，一口氣加咗6個連街機都無嘅新人，只差T.Hawk同DeeJay就集齊《街霸2X》嘅最強人海，慢下手最後仲有殺意隆、入魔Sakura、霸意Ken等，唔爭在加埋葵花寶典同許景琛……

■剛拳（隆、Ken師傅）

■火引彈（當年揶揄《拳X》之丑角）

■Cammy（由機迷投票選出）

■飛龍（簡直係李小龍化身）

走地櫻童顏勁詭異

連埋豪鬼，可用角色共18人，不過其中17人我喺街機已餵過唔少大銀，今日重點要試嘅，當然首推初現真身嘅Sakura。美少女一出場，感覺有啲唔對路，猛然醒起阿櫻花妹早喺《街霸Zero2》已登場，到今日《街霸4》阿Ryu已變成隆叔叔，櫻花仲係咁童顏Feel，廿幾歲人着住水手服周圍撩交打，都幾詭異。
講番人物招式，封得佢做走地櫻，當然因為佢啲招數大多鍾意喺地下走嚟走去，好似重P咲櫻拳、超必春一番等，又有跨過敵人頭頂嘅投技，扎扎跳無時停。雖然同為波昇系人物，不過最食糊嘅絕對係春風腳（旋風腿），咪睇佢得呢一招可EX強化，進攻靈魂其實喺晒度；普通春風腳踢晒3Hit已經要收招，但EX版卻臨尾加多下站立一字馬撐番你上天，跟住任你魚肉；嫌跳踢追打、駁咲櫻拳唔夠華麗，即時SavingCancel前Dash，駁埋終極Ultra技春爛漫都仲得！成套招式易出易駁，成功令走地櫻晉身黑馬之列。

■跳重拳↓下中腳↓EX春風腳↓SA↓Ultra春爛漫，豪鬼一早扣到無血。

■豪鬼成功陰人瞬獄殺後真係勁有快感。

■伶伶丁丁凸出嚟嗰兩格，就係Capcom即場解鎖畀我哋玩嘅人物。

齋對戰未能換新衫

除咗有乜新人，機迷最緊張嘅當然係移植度啦；試玩金碟仍只得XB360版，開Game時只得單打模式（可亂入），無任何練習、連線、求生戰、二揪一等慣常Mode出現，連爆機都無，有點可惜。按Start開始4秒內Load完碟，角色出場動畫可即時Skip走，過程流暢迅速，感覺跟街機真係無分別。最遺憾係打完後嘅評分畫面，依然不見用嚟買衫嘅BP分數，以及段位分數，呢樣相信係全港街霸迷最恨玩到嘅新系統。
畫面表現基本靚仔，遊戲節奏比街機好像更快了一丁點，攻擊判定、招式平衡等並無不對勁地方，打咗幾粒鐘都無咩Bug，完成度比想像中更高，好大機會如製作人小野義德所講，會趕喺09年2月前登場！我已經收起番啲銀仔唔煲街機，留番嚟買家用版同《街霸4》大手掣。

■仲未知家用版有冇得儲錢買新衫！

■SuperCancel，一波未平一波又起。