自由黨前副主席周梁落選後遠遊散心，返歸後接受港台訪問，首次承認有「外圍勢力」，趁自由黨選舉失利，乘機影響該黨參加直選路線。周太爆料，起初只係有「少少聲音」，指區議員日後可以繼續選區議會，但就唔好諗住選立法會嘞，後來「外圍勢力」得寸進尺，有財團更向黨內部份立法會議員施壓，叫佢哋識做，「選功能組別好嘞，唔好選直選。」
「外圍勢力」令自由黨分裂，周太話好彩最後都頂得住，成功保住黨繼續直選嘅路線，「我覺得今次佢哋（外圍勢力）係唔成功，但亦反映我哋個黨唔係好成熟。」對於三位議員黨友退黨，周太話大家「再見一定係朋友」，但坦言幾人所作所為對個黨唔好，對佢哋本人亦未必有好處。
近日李大壯頻頻批評自由黨，周太話自己做副主席時，李大壯唔多開會，同黨友亦冇乜接觸，對佢所為，冇乜好講。回顧從政生涯，周太點咗首英文歌Happytogether畀自己同黨友，話離離合合好平常，最緊要開開心心，佢話離開政壇會裸退，多數唔會再做公職，多啲時間湊孫最開心。