政治飯局通常言不及義吹水唔抹嘴，噚日立法會請特首煲呔同多個高官食晏，卻有意外驚喜，酒酣飯飽食埋飯後果，煲呔突然宣佈擱置攞千元生果金要資產審查建議，並決定調高生果金至1,000蚊，議員忽然聽到喜訊，飯氣全消全場鼓掌。
煲呔上星期施政報告提出攞多啲生果金要先審查，當場俾毓民掟蕉，好多人對煲呔唔敬老十分反感，各黨派一致狂轟，捱唔到10日煲呔終於知衰；成功迫使煲呔轉軚，議員紛紛邀功，對自己維護長者利益感到十分馨香。
出完蕉再吟詩助興
社民連長毛意氣風發，即席吟詩，「一蕉掟出新世代，半式已救老人家。」表示若非毓民出蕉，煲呔又點會改弦易轍？毓民極力壓抑興奮心情，話如果早知煲呔收回忤逆建議，佢會買定梳蕉，唔係掟，而係送畀煲呔孝敬佢咁話。
工聯會王國興唔抵得社民連咁「蕉」積，好得戚咁話，工聯會破天荒修訂對施政報告嘅致謝議案，要求取消資產審查建議，先至係令煲呔就範嘅原因，「連我哋都提出修訂，對佢係好強大政治壓力。」民主黨黃成智則話，施壓唔係得把口，該黨號召長者圍堵禮賓府，煲呔抵擋唔住人民力量，收回成命係唯一出路。
煲呔向生果金開刀激起民憤，日前有個83歲老人家，透過公民黨余若薇向政府退回幾年嚟領取嘅8,000幾蚊生果金，以示對煲呔不滿，余大狀噚日話呢個長者嬲到要回水庫房，相信都對煲呔有啲壓力，凸顯施政真係倒行逆施，神憎鬼厭。
議員爭做「果王」盡顯政客本色，八方相信議員日後唔使再出蕉，新任立法會主席曾鈺成應該少好多煩惱，噚日高官議員飯局，佢講笑話立法會仍未將生果列為違禁品，有飯後果供應，議員亦可自攜，香蕉、蘋果、橙無任歡迎，但千祈唔好掟畀佢，交畀工作人員就得。
攞生果金要資產審查咁離譜，各黨派已準備好追殺煲呔，唔係買榴槤，而係印晒單張落區派發，發動民意反對，煲呔突然煞掣，政黨亦急急叫停，並撤回遺憾施政報告議案，畀番個彩煲呔，至於下一步行動，據了解泛民初步共識，會轉而爭取全民退休保障計劃，呢個問題爭議性極大，真係有排拗。
mailto:[email protected]