近排有朋友同我講，食咗啲膠囊裝嘅健康產品覺得嗰胃好唔舒服，哽住哽住咁，好似消化唔到個膠囊，但食膠囊裝嘅西藥又無呢種情況，唔知啲膠囊嘅成份係咪有唔同，我特登請教咗藥劑專家，發現市面嘅膠囊產品成份差異好大，由用豬、牛等嘅動物骨骼，到澱粉質都有，所以如果係要謹守素食規條嘅人士，食藥丸前應該問清楚膠囊嘅成份。
蛋白質可致過敏
醫院藥劑師學會藥物教育資源中心項目總監崔俊明話，藥丸膠囊嘅成份統稱叫做Gelatin，製造Gelatin嘅材料好廣泛，由成本較低嘅動物骨骼，好似豬骨或者牛骨，以至成本比較高嘅澱粉質都有。𠵱家好多藥廠都用澱粉質做嘅膠囊，因為動物骨骼含有蛋白質，或者會引致病人過敏，但澱粉質無呢個問題，比較安全，符合製造西藥比較嚴格嘅安全標準。
好多人都會問點解要用膠囊載住啲藥，崔俊明話膠囊係𠵱家最方便嘅藥物盛載體，只要將藥物製成粉狀，入落膠囊就可以出廠，比用糖衣或製成藥餅方便及易入口。
膠囊一般進入胃部就會自動溶解，釋放出藥物，如果品質好嘅膠囊係唔會有食咗個胃唔舒服嘅問題，但係病人要小心儲存膠囊藥丸，千祈唔好放係潮濕地方，否則膠囊會壞。
市面林林總總嘅健康產品都係膠囊裝，崔俊明就提醒大家健康產品唔同西藥，質素可以話係冇王管，所以膠囊嘅成份係乜都無人知，有機會係用動物骨骼做，如果對蛋白質敏感嘅人就要特別小心，膠囊幾耐先可以消化亦無標準，所以食完覺得唔舒服，就千祈唔好再食，同埋記得睇醫生。
blog主：醫神