詹瑞文近年搞嘅舞台劇大受歡迎，佢旗下嘅PIP文化產業，噚日傳出受到金融海嘯影響而裁員，馮仁昭噚日致電詹Sir求證，佢話：「其實我哋公司近期要配合其他發展，同部份員工嘅合作方式變咗，全盛時期有30人，𠵱家約有20人，嗰10個空缺，有啲係離職，有啲係轉換咗合作形式。」詹Sir指呢個變化係想開源節流。
門票賣出九成
詹Sir下個星期四係佢第9次公演舞台劇《男人之虎》，問裁員會唔會影響演出？佢話：「唔會，我哋呢套劇會帶畀港人自強訊息。」問佢現時經濟不景，對10場演出嘅票房有冇影響？佢話：「都賣咗九成飛。」
另外，為咗鼓勵首當其衝被金融海嘯衝擊嘅金融界同業，詹Sir好體諒佢哋遇到沉重壓力，話好希望帶歡樂畀大家，所以佢特別拎咗1,000張飛請佢哋睇《男人之虎》。詹Sir話：「《男人之虎》會帶畀大家自強精神，呢個係一個正面訊息，我好希望全港巿民齊齊共度時艱，一齊捱過去。」