解放軍駐港部隊噚日派咗80名男、女官兵到訪科大，同學生打成一片，一齊參觀校園、上堂同食飯。據知有關方面原本派國防大學官兵到訪，後來發生四川大地震，軍人優先救災，參觀行程押後半年，亦改為派駐港部隊到科大。
解放軍駐港部隊副司令員董文久噚日證實，神七航天員稍後訪港，佢話航天員訪港，可以鼓舞港人信心。個市跌到面目全非，太空人訪港帶來火箭效應，恒指衝番上去就好咯。科大消息人士話，聽聞太空人下月中會嚟科大，但由於太空人行程係國家機密，所以暫時仍未能確定。
科大校長朱經武都好關心金融海嘯，唔止擔心身家縮水，仲怕影響大學籌款，佢話近日都冇搵人籌款，費時食檸檬啦。