萬聖節成為近年潮流玩意，大人細路鬼聲鬼氣不亦樂乎，估唔到全城搞鬼驚動天主教香港教區，早前有班教友家長喺教區官方刊物《公教報》刊登聲明，反對天主教學校舉辦萬聖節活動，擔心嚇親仔女弱小心靈，亦驚佢哋「與亡魂來往」走火入魔。
香港天主教區學校聯會主席葉錦元校長話，學校藉萬聖節搞吓英語學習活動，輕輕鬆鬆玩吓無傷大雅，因為萬聖節係文化嘅一部份，教會卻無需要鼓勵大家開party慶祝，因為天主教只有諸聖節，而冇Halloween。
油麻地天主教小學（海泓道）校長張志鴻認為家長唔使太敏感，佢指好多中國傳統節日，好似農曆七月十四鬼節咁，老師從文化角度向學生介紹好平常，揀萬聖節搞課外活動亦然，都係想學生透過遊戲學習。
天主教教區秘書長李亮神父坦言，教會團體同學校都唔應該搞萬聖節活動，又指學習語文有好多方法，唔需要揀萬聖節，「學英文同着到古古怪怪有咩關係？可能誤導咗學生迷信。」𠵱家啲細路正一精過鬼，點可能玩吓萬聖節就俾鬼迷？家長咪咁天真啦。