曾當過歌手的塔羅牌占卜師姚安娜（Lilith），最近再次唱歌，自資舉行一場音樂會。超過10年沒公開演唱的她，心情相當興奮，但原來她為完成夢想，不惜借錢開騷，她也坦言其夫「有時都鬧我黐」。 撰文：胡比
姚安娜曾於兒童節目《閃電傳真機》當過主持，97年加入樂壇，最hit的一首歌是《狡辯》，被指模仿王菲唱腔，推出過半張碟，她解釋因為當年與另一女新人一起出碟，每人5首歌，之後便銷聲匿迹，再在幕前出現，身份已是塔羅牌占卜師，結了婚，生了個女。
「連5000元手袋都冇」
為何會成為半碟歌手呢？Lilith說：「當年唱片公司知道我拍拖，要我同男朋友分手，我覺得唔合理，唔肯分手，之後就俾公司雪藏，雪藏期間我就同男朋友結婚，之後仲生埋個女，咁咪索性唔做，湊女囉。」
擁有一半葡萄牙血統的她，自言小時候便有第六感，14歲開始自學塔羅牌占卜。2000年時她小試牛刀在朋友的酒吧中，擺檔占卜，起初並沒有收費，其後反應越來越好，便開始以此為工作。雖然略有名氣，不過Lilith坦言從沒賺過大錢，她說：「好多人都唔信我冇錢，仲成日將我同麥玲玲比較，話麥玲玲都有保時捷喇，但我連一個超過5,000蚊嘅手袋都冇囉。」
忠於自己不妥協
Lilith為人占卜無數，問她會否經常為自己占卜？她說：「都唔會成日卜，有大決定嘅時候就會卜囉。」她表示當年唱片公司要她與男友分手，抉擇是否應該妥協時，當時抽到的牌是「叛逆者」，代表她根本不是喜歡妥協的人，要忠於自己，最後她選擇了結婚，之後便是要不要成為占卜師，她說：「呢個係影響我人生嘅決定，所以我一定要卜，結果係得來一隻『最終的』牌，當時好矛盾，但我卜咗3次都係呢隻牌，咁我就知道呢個係我嘅使命。」最近一次，便是為了音樂會，她說：「卜到係困難重重，冇任何利益可言，但只要有一個表演機會，畀我不斷提升自己，就算幾辛苦都覺得值。」
Lilith解釋塔羅牌只是一種占卜的工具，當人在困惑、迷失的時候，給予靈感去啓發人的思想，她說：「塔羅唔係神，佢唔會教你點做，最終嘅決定都係自己，就算占卜到唔好嘅牌，只係有個心理準備，會有唔好嘅事發生。」
「老公都鬧我黐」
Lilith為了這個「煉金術之鳳凰誕生音樂會」，除花上精神外，不惜向家人借錢完成她的夢想，她說：「我覺得𠵱個城市太過物質，大家都冇晒夢想，我都曾經沮喪，我太喜歡藝術同音樂。今次搞呢個音樂會，係想話畀大家聽，我姚安娜結咗婚，生埋女都可以完成夢想，點解其他人唔得呢？我要帶出正面嘅激勵，安撫大家嘅心靈，好似音樂會個名，煉金術係要讓人鍛煉，再以等格交換心中想要嘢，鳳凰有重生意思，我希望大家都有機會重生。」
對於家人的無限量支持，丈夫對自己的包容，Lilith感激萬分，她與丈夫結婚十年，她說：「佢係我最尊重嘅人，佢嘅思想成日都係以人為本，我啲咁任性嘅行為，佢照單全收，雖然有時都會鬧我黐，話我咁做係錯晒，不過都係笑住咁鬧。」
攝影：陳慧安、陳志嵐
人物誌：半碟歌手開檔占卜
原名姚秀齡的姚安娜，現年33歲，15歲參加新秀入行，後成為兒童節目《閃電傳真機》主持，同時兼職任零食店售貨員，又曾推出唱片《2inOne》，以王菲腔演繹《狡辯》成半碟歌手（圖）。97年認識現任丈夫，因遭唱片公司雪藏而潛心鑽研塔羅牌占卜，99年誕下女兒後，更自稱有第六感。00年開始在清吧當占卜師，漸為人所識，又曾自設流動占卜車增加客路，當中不乏明星名人。
資料庫：玄學家踩入娛圈
近年不少玄學家都涉足娛圈，除主持電視或電台節目講風水命理外，還拍戲出碟做明星，財源滾滾。
麥玲玲--在娛圈人緣甚廣，常主持風水節目。去年更加入樂壇，與組合農夫rap《風生水起》，大收宣傳之效。
蘇民峰--曾以玩票性質客串電影，如《嫁個有錢人》（02年）及《行運超人》（03年）等，又拍亞視劇集《今日法庭》。現主持有線風水及旅遊節目。
李丞責--瓣數多多，包括電台及電視節目，亦曾參演電影《香港第一凶宅》及《豪情》。
戴子珽--原名歐芷婷，97年參選港姐，落選後曾任職空姐及公關。後拜師學術數，自稱師承「敦煌龍門」，憑無綫《人傑地靈》成名。現主持亞視旅遊節目《開心到鎮》。
資料來源：《蘋果》資料室