銀行銷售迷債等金融產品好多市民中招，唔少官員、議員都係受害者，民主黨甘乃威冇買雷曼產品，不過買咗股票掛鈎票據（ELN）都出事，有人質疑佢處理苦主個案時有利益衝突，為免被人抽秤，佢已賣出所持ELN。
甘乃威之前用50萬元買入ELN，賣出後取回12.8萬元，蝕咗30幾萬元，真係壯士斷臂，佢話現時個人已冇任何投資產品喺手，身份唔係投資者，更信晒財爺、任總，全副身家只做定期，𠵱家係小存戶。甘乃威稱，由於立法會調查迷債小組，日後可能查埋其他金融產品，為免遭人口實，決定忍痛沽貨，如果阿Q精神去諗，𠵱家賣仲有錢收番，等到夠期續回隨時渣都冇㖭。