全球經濟凍到縮，打工仔隨時飯碗不保，公務員隻鐵飯碗例外，不過唔係人人鍾意捧鐵飯碗，八方聽聞，最近有個政府部門請咗廿幾三十人，不到幾個月，竟然有一半人起身，真係講都冇人信。
何解鐵飯碗都唔要呢？原來又關煲呔事。有官員話，新人初入政府，工作量固然唔輕，而且經常畀市民鬧，搞到好無癮。佢話大部份部門已公開各級職員電話號碼，市民上網就搵到，因此好多時候會直接打電話投訴，唔使致電政府熱線1823咁轉折。
會花時間搵官員電話嘅市民，可以想像苦水滿到瀉，破口大罵已經算好修養，有人甚至問候埋官員家人祖宗，新人唔習慣，咪遞信唔撈囉，市民咁多不滿，講到尾又係多得煲呔好事多為。呢個高官同八方講，為免連累家人，惟有搵秘書捱義氣，秘書放工後就唔接電話，上司、同事有要事，自然識打另一個電話號碼。