轆Book：貴氣牛紳士

金牛，屬深思熟慮、大器晚成的星座，一派成熟穩重。第一時間，我想到Jaguar，英式紳士風範，典雅成熟，一直形象鮮明。Jaguar堅持傳統，似足金牛嘅執着，不過呢隻講貴氣品味嘅「金」牛絕唔會死牛一面頸，一成不變，有時又會畀你少少驚喜，好似X-Type咁，相對小巧之餘更大谷運動味，梗係啦，牛牛都好有活力㗎！

記者：黎頌詩
攝影：陳盛臣
Model：Phoebe（StageModel）

有要求不浮誇

牛，形象就梗係刻苦耐勞，勤勤懇懇日做夜做啦！不過咁，𠵱家講嘅係「金」牛，會講求物慾，識要求品味，無論愛情還是生活，佢哋都好享受美麗同富有所帶嚟嘅滿足。所以，功能只係維持喺基本代步水平嘅座駕，絕對唔係金牛人杯茶。走高級路線嘅Jaguar由始至終都賣高雅、玩品味，懶理別人一大堆高科技去取悅用家，佢就堅持用美態就可叫人迷倒。我同意，Jaguar從來都靚爆鏡，車頭一隻線條優美嘅躍豹，已叫唔少人有情意結，巨型穩重，坐落舒適又安全感十足。不過金牛雖然天生憂鬱內斂，但有時都會出人意表嚇你一驚，就好似X-TypeSport，一下子放棄老成持重，換上大膽年輕Look，不過金牛凡事講規則講合理性，所以玩變身亦保持既有嘅氣質。外形上，X-TypeSport算係堅持住Jaguar固有嘅味道，一派斯文。網狀鬼面罩配上豹頭徽章，好有英國味，再加埋經典躍豹，無抗議。如波浪起伏嘅頭冚係另一靚點，細心欣賞，竟發覺線條與頭燈配合成豹爪般的模樣，可真越睇越精采！當然啦，金牛從來就不浮誇，夠耐看！至於跑味嘛，就表現得較為含蓄，靠晒車尾嘅一塊小尾翼。

■波浪形的頭冚，令車頭造型別具特色，穩重中又多點活潑感。

■唔少Jaguar嘅Fans都好堅持，車頭呢隻優美躍豹，係延續品牌血脈嘅標誌，唔少得！

■算係新一代標記嘅豹頭徽章加網狀鬼面罩，一樣好有英國味。

■整體而言，黑銀配襯加上跑味碳纖，內櫳徹底年輕化。

■四圓錶板跑格濃烈，綑上銀邊又刻意保留貴氣，好一招左右逢源。

■除了車側腰線，另有一幼細線條經把手位貫穿全車身。

■出人意表地，內櫳竟用上不少碳纖裝飾，難得與一身典雅味沒衝突。

■車門亦襯上橙紅格仔圖案，跟座椅相呼應。

■新X-TypeSport版專配嘅橙紅格仔圖案座椅，無疑是全車焦點。

■細緻嘅小方格車工，帶嚟英式典雅。

唔愛好勇鬥狠

金牛一向講內涵，又點會俾人一眼睇穿，X-TypeSport一樣，打開車門，眼前一亮，原來內櫳先至見真章，叫人驚喜嘅跑味，強烈爆發！焦點當然係一套橙紅色、車上格子圖案嘅座椅，連車門都有相同嘅皮飾點綴，跑味一樣來得古典高雅。最出人意表嘅，係散佈於中控台及駕駛艙各處嘅碳纖裝飾。沒有桃木谷貴氣，更加換上街味碳纖，大膽改變充滿新鮮感，難得係無突兀之感，就如鑲上銀邊嘅四圓錶板，賣弄跑味卻又堅持高貴感。
金牛讓人着迷嘅地方，亦在於溫柔不鹵莽，無時無刻都樂於照顧別人，讓人安心和信賴。X-Type嘅性能，亦正好體現這股特質，2.1公升V6引擎156匹馬力，明顯唔愛好勇鬥狠，溫柔得嚟，喺有需要時又唔會力有不逮叫你失望。雖說經調校嘅懸掛令Sport版跑起來更有動感，不過穩打穩紮個性不變。外形突出，個性隨和，仲安全感十足，就係金牛魅力！

■尾箱嘅搬運能力唔弱，合晒金牛有承擔嘅個性啦。

■2.1公升V6引擎156匹馬力，賣嘅係穩重。

■尾燈線條圓潤，即使配上尾冚的小定風翼，都只有活力，不見霸氣。

規格

引擎：2,099c.c.V6
馬力：156bhp/6,800rpm
扭力：196Nm/4,100rpm
傳動：5前速自動波
售價：$369,900
查詢：積架香港（25200989）