吸取煲呔多年前盲目唱好被恥笑係「聖誕權」教訓，近期財金官員一味唱淡前景，財爺鬍鬚曾百忙中都寫個blog，形容近幾個星期感覺一直在打仗，至於敵人何在，佢都冇答案。
金融巨浪難估計
係人都知金融海嘯殺到埋身，鬍鬚曾話呢個巨浪有幾高難以估計，而巨浪席捲後，可能發現好多人唔止輸身家，甚至泳褲都冇埋。投資者輸到冇褲着當然凄凉，散戶俾銀行誤導買迷債，被銀行「剝光豬」更無陰功，鬍鬚曾仍然質疑立法會用《權力及特權條例》介入調查，指可能令事件變得「晦暗不明」。如果只係要錢而唔要公道，鬍鬚曾都不無道理。
為專心應戰，鬍鬚曾透露近期已取消三次外訪，八方好支持高官留守領軍，慳啲公帑都係好事，更希望其他官員都效法，商務及經濟發展局局長劉吳惠蘭可能認為有危先有機，噚日帶團到四川及西班牙訪問，港府話局長此行會探討產業轉移同合作商機，又會探望大熊貓；至於去西班牙馬德里，劉吳局長會同西班牙工業、旅遊及貿易部長MiguelSebastian簽署葡萄酒相關業務合作諒解備忘錄，月底回港。