環球股市骨牌式連環下跌，人心虛怯，李超人都要嗌停新投資，旗下和黃宣佈出年6月前，暫緩全球各地新投資。驚濤駭浪之際超人要入避風塘，不過新世界彤叔卻話唔驚，噚日獲頒大紫荊勳章後，好肯定咁講，作為商人唔會唔投資，只要係賺錢嘅項目都會投資，仲反問「唔通唔做生意呀？」
八方只係打工仔，唔識做生意，唔知超人會點答，不過超人近排忙於檢討全部投資項目，相信唔得閒反駁彤叔。彤叔喺商界打滾幾十年，乜嘢風浪未見過？佢勇於喺淡市時落重注，所以有「沙膽彤」外號，佢噚日話𠵱家個市確係曳啲，但相信只係暫時性，將來一定會升番。
彤叔：唔通唔做生意呀
彤叔又話今次經濟逆轉係環球性，市民要淡定，亂市都可以投資，但一定要審慎，彤叔唔係得把口，佢話自己作為商人，冇打算好似和黃咁縮手，「我哋有樣好，就係唔會唔投資，只係睇時機，如果係賺錢嘅項目一定投資，唔通唔做生意呀？」有人聽完彤叔咁講，思疑佢暗寸超人。投資眼光各有不同，新世界都曾經入錯貨元氣大傷，有膽識唔一定夠眼光，所以八方唔敢揣測彤叔意思，大家自行判斷。
噚日儀式共有200幾人獲授勳，獲得殊榮應該喜氣洋洋，不過有啲勳章，攞咗反而傷感。月前旺角嘉禾大廈大火，兩名消防員陳兆龍、蕭永方不幸殉職，為表揚佢哋捨身救人，港府追授金英勇勳章畀兩人，噚日由兩位英雄家人上台代領勳章，全場掌聲雷動，好感人。
其他獲授勳人士，仲包括樹仁大學校監胡鴻烈、終審法院首席法官李國能同長江製衣廠主席陳瑞球，三人都係獲最高榮譽大紫荊勳章，李官話感到好榮幸，認為港府嘉獎佢，係對全港法官貢獻作出肯定。得到榮譽勳章嘅探險家李樂詩啱啱由北極返嚟，佢話極地情況較金融海嘯嚴峻得多，北極熊受全球暖化影響好慘情，「啲北極熊冇嘢食，又返唔到屋企。」
證監會主席方正，今年獲頒金紫荊星章，佢噚日表示好開心，期望本港經濟盡快穩定，社會各方面盡快復蘇，市民重過好日子，但當被問及有關證監會調查雷曼及中信泰富進展時，佢唔回應即閃。
mailto:[email protected]
